ལྟོ་ཆས་ཀྱི་འདོད་པ་མ་ཚིམ་པ་ནི་ཤུགས་རྐྱེན་ཤིན་ཏུ་ཆེ་བའི་ཆབ་སྲིད་དོན་རྐྱེན་མང་པོ་ཞིག་གི་སློང་རྐྱེན་གཙོ་བོ་ཡིན་པ་གདོན་མི་ཟ། ཡིན་ནའང་། མིརི་རིགས་ལ་འདོད་པ་ཡོད་པས་ང་ཚོ་དང་སྲོག་ཆགས་གཞན་དག་བར་ལ་ཁྱད་པར་ཧ་ཅང་ཆེན་པོ་བྱུང་ཡོད། དེ་བས་རྫོགས་མཐའ་མེད་པ་དང་། ནམ་ཡང་ཡིད་ཚིམ་ཐབས་མེད་པའི་འདོད་པ་དག་གིས་ཟག་བཅས་ཐམས་ཅད་ཀྱི་ལུས་སེམས་གཉིས་ཀ་ཟིང་ཟིང་གི་ཁྲོད་དུ་བརྫངས་ཡོད།
སྦྲུལ་ཆེན་གྱིས་ཟ་མ་ཟོས་ནས་ཡིད་ཚིམ་རྗེས་གཉིད་དུ་ཡུར་བ་དང་། སླར་ཡང་ལྟོགས་བྱུང་ན་ད་གཟོད་གཉིད་ལས་སད་ངེས་རེད། མིའི་རིགས་ནི་ཚད་ངེས་ཅན་ཞིག་གི་སྟེང་ནས་བཤད་ན་དེ་འདྲ་གཏན་ནས་མིན།
ཨ་རབ་མི་རྣམས་ཀྱིས་རེ་ཞིག་གྲོན་ཆུང་ཅན་གྱི་འཚོ་བ་སྐྱེལ་བཞིན་ཡོད་པ་དང་། རྗེས་སུ་རོ་མ་ཤར་མའི་བཙན་རྒྱལ་གྱི་རྒྱུ་ནོར་འབོར་ཆེན་འཕྲོགས་ཏེ་ལོངས་སྤྱོད་བྱེད་པར་གོམས་ཡོད་པ་དང་། བསམ་ཡིད་ལས་འདས་བའི་ཕོ་བྲང་ཆེན་པོའི་ནང་སྡོད་མྱོང་མོད། ཡང་ཀྱང་ཨ་རབ་སྐུ་དྲག་རྣམས་བསམ་ཚོད་ལྟར་ལུས་སེམས་ལྷིང་འཇགས་ཀྱི་དབང་དུ་ཕྱིན་མེད། ཁོ་ཚོས་རྣམ་འགྱུར་དང་ལག་བརྡ་རེ་སྟོན་ན་གྷུ་རེ་སིའི་བྲན་གཡོག་གིས་སྐུ་དྲག་ཁོང་ཚོར་ཟས་རིགས་སྤུས་ལེགས་སྤྲོད་ངེས་རེད། དེ་བས། ལྟོ་ཆས་ཀྱི་འདོད་པ་ལས་ལྷག་པའི་འདོད་པ་གཞན་པས་ཁོ་ཚོས་སེམས་པ་བཀྲུགས་ཡོད།
འདོད་པ་གཞན་དག་ནི་འདི་ཚོས་སྟེ། བདག་འཛིན་གྱི་ཧམ་པ། འགྲན་རྩོད་ཀྱི་འདོད་པ། གཏམ་འདོད་ཚ་པོ། དབང་གྲགས་ཀྱི་ཧམ་པ་བཅས་རེད།
དང་པོ། བདག་འཛིན་གྱི་ཧམ་པ།
བདག་འཛིན་གྱི་ཧམ་པ་ནི་རྒྱུ་ནོར་གྱི་ཁེ་དབང་གང་མང་ཡོད་པར་རེ་བ་བྱེད་ཀྱི་ཡོད་པ་དེ་རེད། འདི་ནི་ཀུན་སློང་ཅིག་ཡིན་པས། ངའི་བསམ་པར་ཀུན་སློང་འདི་རིགས་ནི་དབུལ་ཕོངས་ཀྱི་བག་ཆགས་སམ་འཇིགས་སྣང་དེ་འཚོ་བའི་ཉེར་མཁོའི་དངོས་རྫས་ཟུང་འབྲེལ་ལས་བྱུང་བ་རེད་སྙམ།
བདག་གིསསྔོན་ཆད་ཧྲ་ཧྲ་ཉི་ཡ་ནས་ཡོང་བའི་བུ་མོ་ཆུང་ཆུང་གཉིས་ལ་སྙིང་རྗེ་བྱམས་སྐྱོང་བྱེད་པ་ཡིན། ཁོ་མོ་ཚོ་ནི་བཀྲེས་ལྟོགས་ཀྱི་མུ་གེའི་ཁྲོད་ནས་བྲོས་བྱོལ་དུ་ཡོང་བ་ཡིན། ་ངའི་ཁྱིམ་དུ་བསྡད་ན་ཁོ་མོ་གཉིས་ཀར་ལྟོ་ཆས་འདང་ངེས་ཤིག་ཡོད་པ་སྨོས་མེད་རེད། འོན་ཀྱང་ཁོམ་པ་ཡོད་མ་ཐག ཁོང་གཉིས་ཉེ་འདབས་ཀྱི་ཞིང་རར་ཞོག་ཁོག་བརྐུ་རུ་འགྲོ་བར་གོམས་ཡོད་ལ། ཞོག་ཁོག་དེ་དག་ཆ་གསོགས་བྱས་རྒྱུ་བྱུང་།
ལུའོ་ཁེ་ཧྥེས་ལོ་ན་ཆུང་བའི་སྐབས་སུ་འཚོ་བ་ཧ་ཅང་དབུལ་པོ་ཡིན་པ་དང་། ནར་སོན་རྗེས་སྔར་བཞིན་ལོ་ན་ཆུང་དུས་དང་འདྲ་བའི་འཚོ་བ་སྐྱེལ་སྟངས་རྒྱུན་འཁྱོངས་བྱེད་བཞིན་ཡོད། དེ་དང་འདྲ་བར། ཨ་རབ་ཀྱི་སྐུ་དྲག་ཚོ་དཔོན་རྣམས་ཟས་རང་གྲུབ་དང་གོས་རང་གྲུབ་ཀྱི་འཚོ་བ་བསྐྱེལ་ཡོད་ནའང་སྔར་བཞིན་བྱེ་ཐང་གི་དབུལ་ཕོངས་འཚོ་བ་བརྗེད་ཐབས་ཡོད་མི་འདུག ཡིན་ནའང་ཨ་རབ་ཀྱི་སྐུ་དྲག་ཚོ་དཔོན་རྣམས་ཀྱིས་བསགས་པའི་རྒྱུ་ནོར་ནི་རང་གི་མཁོ་དགོས་ལས་ལྡབ་གྲངས་མེད་ཀྱིས་འགོངས་ཡོད་པ་རེད།
བདག་འཛིན་གྱི་ཧམ་པ་ལ་སེམས་ཁམས་དབྱེ་ཞིབ་ཇི་ལྟར་བྱེད་ནའང་། དེ་ནི་ཤུགས་རྐྱེན་ཟབ་པའི་ཀུན་སློང་དྲག་པོ་ཞིག་ཡིན་པ་གདོན་མི་ཟ། ལ༈ག་པར་དུ་དབང་ཅན་ངོ་ཅན་གྱི་གང་ཟག་ལ་བདག་འཛིན་གྱི་ཧམ་པ་དེ་བས་ཆེ།
བདག་གིས་གོང་དུ་བཤད་པ་ལྟར། བདག་འཛིན་གྱི་ཧམ་པ་ནི་འདང་ཐབས་མེད་པའི་ཀུན་སློང་ཞིག་ཡིན་རེད། མི་རྣམས་ལ་རྒྱུ་ནོར་ཅི་འདྲའི་མང་པོ་ཡོད་རུང་། ཁོང་ཚོས་སྔར་བཞིན་དེ་ལས་མང་པོ་ཞིག་བདག་འཛིན་བྱེད་བསམ་ཀྱིན་ཡོད། རྦད་དེ་ཡིད་ཚིམ་པ་ནི་མངོན་འགྱུར་བྱེད་ཐབས་བྲལ་བའི་རྨི་ལམ་ལྟ་བུ་ཞིག་རེད།
གཉིས་པ། འགྲན་རྩོད་ཀྱི་ཧམ་པ།
བདག་འཛིན་གྱི་ཧམ་པ་ནི་མ་རྩའི་རིང་ལུགས་ལམ་ལུགས་ཀྱི་སྒུལ་ཤུགས་གཙོ་བོ་ཡིན་མོད། འོན་ཀྱང་བཀྲེས་ལྟོགས་ཀྱི་གནད་དོན་ཐག་བཅད་རྗེས། མི་རྣམས་ལ་མཚོན་ན་དེ་ནི་ཆེས་ཤུགས་དྲགས་པའི་ཀུན་སློང་མ་རེད། གང་ལེགས་ཤེ་ན། མི་རྣམས་ལ་འགྲན་རྩོད་ཀྱི་ཧམ་པ་རྒྱུན་ཆད་མེད་པས་རྐྱེན་གྱིས་རེད།
འགྲན་རྩོད་ཀྱི་ཧམ་པ་ནི་སྟོབས་དང་ལྡན་པའི་ཀུན་སློང་ཞིག་ཡིན། དབྱི་སི་ལན་གྱི་ཆོས་འབྱུང་ལོ་རྒྱུས་ཐོག་ཏུ་བཀོད་པ་ལྟར་ན་རྒྱལ་རབས་མང་པོ་ཞིག་ལ་ཆག་སྒོ་ཚབས་ཆེན་བྱུང་ཡོད། དེ་ནི་རྒྱལ་པོའི་བཙུན་མོ་ཆེ་ཆུང་དག་གི་རྒྱལ་སྲས་ཕན་ཚུན་མི་མཐུན་པ་དང་ནང་འཁྲུག་བསླངས་ཡོད་པས་རེད། དེང་རབས་ཀྱི་ཡོ་རོབ་ཏུ་ཡང་རྒྱལ་སྲས་བར་གྱི་འགྲན་རྩོད་ལས་བྱུང་བར་ཆག་སྒོ་དོན་རྐྱེན་གང་མང་བྱུང་ཡོད་པ་རེད།
དབྱིན་ཇིའི་སྲིད་གཞུང་གིས་ཇར་མན་གྱི་གོང་མ་མཚོ་དམག་ཞིབ་བཤེར་ཚོགས་ཆེན་ལ་གདམ་འདྲེན་བྱེད་པའི་སྐབས་སུ། ཇར་མན་རྒྱལ་པོའི་སེམས་སུ་མ་འོངས་བར་ཇར་མན་གྱིས་ཀྱང་དབྱིན་ཇི་ལ་འགྲན་ཚུགས་ཐུབ་པའི་མཚོ་དམག་རུ་དཔུང་སྤེལ་རྒྱུའི་འཆར་གཞི་འཐེན་ཀྱིན་འདུག ཁོའི་བསམ་ཚུལ་དེས་རྗེས་ཀྱི་དམག་འཁྲུག་དང་རྙོག་དྲ་རབ་དང་རིམ་པ་བྱུང་དུ་བཅུག་པ་རེད།
གསུམ་པ། གཏམ་འདོད་ཚ་པོ།
གཏམ་འདོད་ཚ་པོ་ནི་ལྒོག་གྱུར་ཤུགས་རྐྱེན་ཧ་ཅང་ཆེ་བའི་འདོད་པ་ཅིག་ཡིན་ལ། འདོད་པ་དེ་རིགས་ལ་མཚོན་ཚུལ་སྣ་ཚོགས་ཡོད་པ་སྟེ། བྱིས་པ་ཚོས་བཞད་གད་སློང་བ་དང་ཤི་རྗེས་ཀྱི་མཚན་སྙན་བསམ་པ་སོགས་ཀྱང་འདིའི་རིགས་སུ་ཚུད་ཡོད། གཏམ་འདོད་ཚ་བའི་གནོད་པའི་གྲས་ཤིག་ནི། འདོད་པ་ཇི་ཙམ་ཚིམ་ན་གཏམ་འདོད་དེ་ཙམ་གྱིས་རྒྱས་པར་གྱུར་པ་དང་། ཕ་རོལ་བ་དེར་གླེང་མོལ་ཇི་ཙམ་མང་པོ་བྱས་ན་དེ་ཙམ་གྱིས་གཞན་གྱིས་གླེང་མོལ་བྱ་ཡུལ་དུ་གྱུར་འདོད་པའི་རེ་བ་སྐྱེས་བཞིན་ཡོད།
སྲོག་ཁྲིམས་བཅད་ཟིན་པའི་ཉེས་ཅན་ཞིག་གིས་ཚགས་པར་ཐོག་བཀོད་པའི་རང་གི་གནས་ཚུལ་ཇི་ཙམ་མང་ན་ཚགས་པར་དེར་དེ་ཙམ་གྱིས་དགའ་ལ། ཞིབ་ཆ་མི་ཚང་བའི་གསལ་ཚུལ་བཀོད་ཡོད་པའི་ཚགས་པར་གཞན་དག་ལ་དེ་ཙམ་གྱིས་ཚིག་པ་ཟ་སྲིད་པ་རེད། ཆབ་སྲིད་པ་དང་རིག་གནས་པའང་དེ་ལྟར་རེད།
ལོ་གསུམ་གྱི་བྱིས་པ་ཡིན་ནའང་འདྲ། སྨིན་མ་བསྡུ་བ་ནས་འཛམ་གླིང་ཡོངས་ལ་དངངས་སྐྲག་ཐེབས་སུ་བཅུག་པའི་དབང་སྒྱུར་པ་ཞིག་ཡིན་ནའང་འདྲ། གཏམ་འདོད་ཚ་པོ་དེ་མིའི་ཚེ་གང་བོར་ཤུགས་རྐྱེན་གང་འདྲ་ཐེབས་སྲིད་པ་དེ་ནི་བློ་ཡུལ་ལ་མི་གཤོང་བའི་ཚོད་ལ་ཐོན་ཡོད། མིའི་རིགས་ཀྱིས་གཏམ་འདོད་ཚ་པོ་འདི་ཆོས་ལུགས་ཀྱི་ཁོངས་སུ་ཚུད་པར་བྱེད་ནས། ལྷའི་རིགས་ལ་ཡང་གཏམ་འདོད་ཚ་པོ་ཡོད་པའི་གཟུགས་སུ་བཀོད་མཐར། ལྷ་ནི་རྒྱུན་ཆད་མེད་པར་དད་ལྡན་སྐྱེས་འགྲོ་ཀུན་གྱིས་བསྟོད་བསྔགས་ལ་སྒུག་ཡོད་པར་འདོད་ཀྱིན་ཡོད།
བཞི་བ། དབང་གྲགས་ཀྱི་ཧམ་པ།
དབང་ཆ་ནི་གཏམ་འདོད་ཚ་པོ་དང་འདྲ་བར་དབང་ཆ་ཚད་མེད་མ་ལོན་ན་དབང་ཆའི་འདོད་པ་ནམ་ཡང་སྐོང་ཐབས་བྲལ་བ་ཞིག་རེད། ཁྱད་པར་དུ་སེམས་ཤུགས་ཆེ་བའི་སྤྱོད་ངན་གྱི་དབང་གིས་སྐབས་འགར་འདོད་རྔམ་ཅན་གྱི་དམིགས་ཡུལ་འགྲུབ་སྲིད་དེ། མི་ངན་ལག་ལ་དབང་གྲགས་ཐོབ་པ་ནི་སྨྱོན་པའི་ལག་ལ་སྟ་རེ་ཤོར་བ་ལྟར་འཇིགས་ཉིན་ཆེ། དབང་གྲགས་ཀྱི་ཧམ་པ་ནི་དངོས་གནས་མི་སྣ་གལ་ཆེན་ཅན་གྱི་འཚོ་བའི་ཀུན་སློང་དྲག་པོ་དེ་ཡིན།
དབང་ཆ་སྤྱད་པའི་མྱོང་བ་དེས་མི་རྣམས་དབང་ཆ་ལ་དགའ་ཞེན་སྔར་ལས་ཆེ་རུ་གཏོང་སྲིད་པ་ཡིན། དབང་ཆ་ཆེ་ཆུང་ལ་ཐུག་མེད་དེ། རུ་དཔོན་ཞིག་དང་རྒྱལ་པོ་ཞིག་གི་ལག་ཏུ་བཟུང་བའི་དབང་ཆ་ལ་ཡང་དབང་འཛིན་པ་དེ་འདོད་པ་སྔར་ལས་ཚིམ་ཐབས་བྲལ་བའི་གནས་སུ་ལྷུང་ངེས།
དབང་ཆའི་མཚོན་ཚུལ་ནི། མངའ་འོག་གི་མི་རྣམས་ལ་ཁོ་ཚོར་སྒྲུབ་འདོད་མེད་པའི་བྱ་བ་བཙན་གྱིས་སྒྲུབ་ཏུ་བཅུག་པ་དང་། དབངའཛིན་པས་མི་རྣམས་ལ་སྡུག་བསྔལ་ལས་སྤྲོ་སྣང་སྦྱིན་དུ་འཇུག་པའི་ཕྱོགས་ལྷུང་ལྡན། གལ་ཏེ་ཁྱོད་ཀྱིས་ལུགས་དང་མཐུན་པའི་རྒྱུ་མཚན་བཤད་ནས་ཁྱོད་ཀྱི་གོང་རིམ་ལ་དགོངས་པ་ཞུས་ན། གོང་རིམ་མོས་མཐུན་མ་བྱས་ཚེ། ཁོའི་དབང་ཆ་གང་འདོད་དུ་སྤྱོད་ཐུབ་རྒྱུ་བྱུང་བར་ཡིད་ཚིམ་པར་བྱེད་ངེས་ཡིན། གལ་ཏེ་ཁྱོད་ལ་དབང་ཡིག་ཐོབ་འདོད་ན། འབྲེལ་ཡོད་དཔོན་རིགས་ཀྱིས་“མི་ཆོག“ཅེས་བཤད་པ་དེ་ཡིས་བློ་ཡུལ་ཚིམ་ཐུབ་ངེས། གཞན་ལ་བཙན་གྱིས་སྡུག་ཐུག་གི་གནས་སུ་བསྒྱུར་བ་ནི་དབང་གྲགས་ཀྱི་ཉེས་སྐྱོན་ཆེན་པོ་ཞིག་རེད།
དེ་དང་དེ་འདྲའི་གནས་ཚུལ་གྱི་དབང་གིས། དབང་གྲགས་ཀྱི་ཧམ་པ་ནི་ད་གཟོད་ཉེན་ཁ་ཧ་ཅང་ཆེ་བའི་ཀུན་སློང་ཞིག་ཏུ་གྱུར་པ་རེད། འོན་ཀྱང་དེ་ལའང་ཕན་ཐོགས་ཡོད་པའི་ཕྱོགས་ཡོད། མི་རྣམས་ཤེས་བྱ་ལ་ཧུར་བརྩོན་ནམ་འདོད་རྔམ་ཆེ་བ་དེ་དབང་ཆ་ཐོབ་འདོད་པས་རྐྱེན་གྱིས་རེད།
ཚན་རྩལ་ཡར་ཐོན་བྱུང་ཚུལ་ཡང་གཅིག་འདྲ་རེད། དབང་གྲགས་ཀྱི་ཧམ་པ་འདི་ནི་ཡང་སྙིང་ཕན་ཡོད་ཀྱི་བྱ་སྤྱོད་སྤེལ་བ་ཡིན་ནམ་ཡང་ན་གནོད་པ་ཡོད་པའི་བྱ་སྤྱོད་སྤེལ་བ་ཞིག་ཡིན་པ་དེ། དོན་དངོས་སུ་བཤད་ན་སྤྱི་ཚོགས་ཀྱི་ལམ་ལུགས་དང་མི་སྒེར་གྱི་བསམ་སྦྱོར་ལ་རག་ལས་ཡོད།
རྩོམ་པ་པོ། རཱའོ་སུ།