ངའི་ཁྱིམ་རྒྱུད་ཀྱི་གཏམ་རྒྱུད་འདི་གསལ་བོར་བཤད་དགོས་ན། ཐོག་མར་ངས་བརྩམས་སྒྲུང་འདི་ཁྲོད་དུ་ཡ་རྫི་རོང་ཕྱོགས་ཀྱི་ཡུལ་སྐད་མང་པོ་རྫོབ་དགོས། ངས་དང་ཐོག་གཏམ་རྒྱུད་འདི་དག་ཐོས་ཡོང་དུས་བྱིས་པ་ཞིག་ལས་མིན། རྒན་རྒོན་དེ་དག་གིས་སྐད་སྒྲ་དེ་མ་གཏོགས་གཏམ་རྒྱུད་འདི་བཤད་པའི་ཉམས་ཐོན་མི་ཐུབ། ང་ཚོས་སྐད་ཆ་ལ་རྟེན་ནས་བསམ་བློ་གཏོང་གོན་ཡོད་པ་ཡིན་ལ། སྐད་ཆ་ལ་རྟེན་ནས་དགྲ་བོ་དང་རང་ཕྱོགས་ངོས་འཛིན་བྱེད་ཀྱིན་ཡོད། འདས་བའི་ལོ་ཟླ་རིང་མོ་ཁྲོད་ལ། ངའི་ཡུལ་ཕྱོགས་ཀྱི་མེས་པོ་རྣམས་ནི་གཞན་གྱི་སྐད་ཆ་ཉན་མཁན་ཙམ་ཡིན་པ་ལས་རང་གིས་སྐད་ཆ་དེ་རང་གི་བཤད་ཤེས་མཁན་ཏག་ཏག་མིན། དེ་བས་ལོ་རྒྱུས་ཀྱི་དཔེ་ཆ་རྣམས་པ་སྣ་ཚོགས་དེ་གར་བལྟས་ན། ཕལ་མོ་ཆེར་གོ་རྒྱུ་ཅན་གྱི་སྐད་ཆ་བཤད་ཤེས་པའི་བླ་མ་དང་མཁས་དབང་གི་རྣམ་ཐར་མ་གཏོགས་མེས་པོ་གླེན་པ་དེ་དག་ལ་གོ་གནས་དང་ཡིག་འབྲུ་གང་ཡང་མེད། འདི་ནི་མི་ཆོས་རིང་ལུགས་དང་ཡང་ན་མི་གཞི་བརྩིས་མཐོང་སོགས་གང་ཡང་མིན་པར། ངའི་རང་ངོས་ནས་ངལ་རྩོལ་མི་དམངས་ཀྱི་ལས་དབང་བརྗོད་བསམ་པ་ཡང་གང་ཡང་མིན། མི་དེ་དག་གི་གཏམ་རྒྱུད་འབྲི་རྒྱུ་ནི་དོན་དམ་པས་བཤད་ན་རྒྱུད་ལྡན་འཚོ་བར་དོན་སྙིང་ཅི་ཡིན་པབའི་འདྲི་ཚིག་བཏོན་པ་དང་གཉིས་སུ་མེད།
ཡང་སྙིང་གཏམ་རྒྱུད་འདི་བརྗོད་དགོས་ན། ངས་ངེས་པར་དུ་རྒན་རྒོན་མང་པོ་ཞིག་གི་གཏམ་ལ་ཆ་འཇོག་བྱེད་དགོས། ཡིད་ཕངས་པ་ཞིག་ལ། སྡེ་བའི་གཞུང་མདོ་ན་ཉི་མ་འཁྱོལ་ཐབས་སུ་ཁ་བཏོན་འདོན་བཞིན་པའི་རྒན་རྒོན་མང་པོ་ཞིག་ད་ལྟ་གཞི་ནས་འཇིག་རྟེན་འདི་དང་ཁ་བྲལ་སོང་། ཁ་ཤས་སྡུག་བསྔལ་གང་ཡང་མེད་པར་མལ་ས་དྲོན་མོ་ཐོག་ནས་ཚེ་འདས་བྱུང་བ་རེད་ལ། ཁ་ཤས་སྐོར་ལམ་ནས་སྙིང་སྨན་མྱུར་དུ་ལག་ལ་མ་འབྱོར་བར་ཤི་སོང་བ་རེད། ཡང་ལ་ཤས་ནི་སྔར་སྡེ་བ་འདིར་བྱུང་མྱོང་མེད་པའི་འབྲས་སྐྲན་ནམ་མཚེར་ནད་བྱུང་ནས་ཤི་སོང་བ་རེད། གང་ལྟར་མི་རེ་རེའི་ལས་དབང་གཞི་ནས་མི་གཅིག་པས་སྐྱེ་རྒ་ན་འཆི་ལ་ཡང་རྣམས་པ་ཤིན་ཏུ་མང་། ངས་རྒན་རྒོན་འདི་དག་གིས་རྗོབ་པའི་སྐད་སྒྲ་དེ་ལ་ལད་མོད་བྱེད་བསམ་དུས། ཞིབ་ཆ་དང་སྐད་གདངས་ཕལ་མོ་ཆེར་བརྗེད་ཚར་འདུག ཡིན་ནའང་ང་ཚོར་གཞི་གཅིག་ཏུ་འབྲེལ་བྱེད་ཀྱི་རིན་པོ་ཆེ་གཉིས་ཡོད་པ་ནི་སྐད་ཆ་དང་སྐད་ངག་ཡིན། དེ་བས་མེས་པོ་དུ་མ་ནས་དལ་བ་དལ་བུར་བརྒྱུད་ཡོང་བའི་སྐད་ཆས་ངས་བསམ་ཚོར་ཀྱི་སེམས་པ་དེ་མི་རྣམས་ལ་སྒྲུང་གཏམ་འདི་བརྒྱུད་ནས་བསྐྱར་ཟློས་བྱེད་ཆོག འདི་ཡང་སྐད་ཆའི་རིན་ཐང་ཡིན་པ་སྟེ། སྐད་ཆ་ནི་མ་འོངས་བར་ཁ་ཕྱོགས་ཡོད་པ་མ་ཟད། ཕྱོགས་གཞན་ཞིག་ནས་བཤད་ན་དེ་དང་ང་ཚོ་དང་མེས་པོ་ཚོར་འབྲེལ་བ་ཆགས་བྱེད་ཀྱི་ཅ་ལག་གོ་ཆོད་ཅན་དེ་ཡིན།
ང་ནི་སྐད་བརྡ་ལ་ཆེད་དུ་ཞིབ་འཇུག་བྱེད་མཁན་ནི་མ་ཡིན། འོན་ཀྱང་ལོ་ན་ཆུང་ཆུང་ཡིན་དུས་ནས་ལ་ལུང་མང་པོར་གཉུག་པས་རྐྱེན་གྱིས་ང་རང་སྐད་རིགས་སྣ་མིན་དང་ཡུལ་སྐད་མི་གཅིག་པ་དག་ལ་ཤིན་ཏུ་མཚར་སྣང་ཆེ། དེ་བས་ངས་འདས་ཟིན་པའི་ལོ་ཟླའི་ཁྲོད་དུ་ཡུལ་སྐད་སོ་སོར་ཞིབ་འཇུག་ཐན་ཐུན་རེ་བྱེད་མྱོང་ལ། སློབ་སྦྱོང་ཡང་བྱེད་མྱོང་། ཁ་ཕྱིར་འཁོར་ནས་རང་གི་ཡུལ་ཕྱོགས་ཀྱི་སྐད་ཆ་ལ་བསམ་བློ་གཏོང་དུས། ངས་རྒྱུན་པར་ཡ་རྫི་ས་ཆའི་རོང་སྐད་དེ་ནས་ཤིན་ཏུ་རིན་ཐང་ལྡན་པ་ཅན་ཞིག་རེད་བསམ་ཀྱིན་ཡོད། ཨམ་སྐད་ཡིན་པས་ཆ་ནས་དེ་ལ་སྐད་གསལ་བཅད་མ་བྱེད་གོང་གི་སྲོལ་རྒྱུད་བོད་སྐད་ཀྱི་ཁྱད་ཆོས་ལྡན། ཆོས་རྒྱུད་སྣ་མང་དར་ཡོད་པས་རྐྱེན་གྱིས་དུས་རབས་རིམ་བྱུང་གི་ཆོས་དཔེ་བཀླགས་ཐབས་དར་ཡོད། དེ་མ་ཟད་ས་ཆ་འདི་ན་རྒྱ་ནག་དང་ཟར་ལར། ཁ་ཆེ། ད་དུང་ཧོར་རིགས་སོགས་མི་རིགས་མི་གཅིག་སྣ་མང་འདུས་བས་ཕན་ཚུན་བར་ལ་གཡར་མིང་ཡང་ཤིན་ཏུ་མང་། ཡུལ་ལུང་འདིའི་སྐྱེས་ཕོ་མོ་རྒན་གཞོན་མང་པོ་ཞིག་གིས་མི་རིགས་གཞན་པས་སྐད་ཆ་རྫོབ་ཤེས་བས་བཅིངས་འགྲོ་མ་བྱེད་གོང་ལ་གཞུང་ཕྱོགས་ས་བཀྲ་སྟེང་གི་ཡ་རྫི་ས་ཆ་ནི་བོད་ངོ་ཤེས་ཞེས་མཚོན་རྟགས་གསལ་མོ་བཀོད་ཡོད།