སྔོན་ཆད་ང་ཡོད་སའི་མཐོ་འབྲིང་སློབ་གྲྭ་རུ། གསུམ་བརྒྱད་བུད་མེད་དུས་ཆེན་ཉིན་མོར་དགེ་རྒན་བུད་མེད་དག་ལ་ཉིན་གཅིག་གི་གནང་བ་སྦྱིན་ངེས། ཉིན་འདི་ཐོན་ཐེངས་རེར། དགེ་རྒན་སྐྱེས་པ་སྐོར་ཞིག་གིས་སློབ་ཁང་དུ་”བུད་མེད་དུས་ཆེན་ཁོ་ན་ལས་མེད་པའི་རྒྱུ་མཚན་ཅི་ཡིན་ནམ། ང་ཚོའི་སྐྱེས་པ་རྣམས་ཀྱིས་དུས་ཆེན་ལ་མི་འཚམ་པ་ཡིན་ནམ། “ཞེས་འཁང་ར་བྱེད་ངེས་ཡིན། སྐད་ཆ་དེ་ཐོས་རྗེས་སློབ་གྲོགས་ཚང་མ་གད་མོ་ཆེན་པོ་ཤོར་འོང་། སྐབས་དེར་ང་ཡང་གད་མོ་དགོད་བཞིན་ཡོད་མོད། འོན་ཀྱང་དོགས་མི་བདེ་བའི་ཚོར་བ་ཞིག་སྐྱེས།
དོན་དངོས་སུ་ང་རང་དོགས་མི་བདེ་བའི་རྒྱུ་མཚན་ཡོད་དེ། སྐྱེས་པ་ཞིག་གིས་སྐྱེས་པ་རྣམས་ལའང་དུས་ཆེན་ཡོད་པར་འཁང་ར་བྱེད་པ་དེ་ཉན་ཚོད་ཀྱིས་ཧ་ཅང་རྒྱུན་ལྡན་ཡིན་ནའང་། འོན་ཀྱང་གལ་ཏེ་རྐང་ལག་འཐུས་སྒོ་ཚང་བའི་མི་ཞིག་གིས་དབང་པོ་སྐྱོན་ཅན་རྣམས་ལ་དུས་ཆེན་ཡོད་པའི་རྒྱུ་མཚན་ཅི་ཡིན་ཞེ་ན། ང་ཚོ་ཚང་མས་དྲི་བ་བཏོན་མཁན་གྱི་མི་དེ་ནི་གུས་ལུགས་མེད་པར་སྙམ་སྲིད། དཔེ་དེ་བཞིན་དུ། སྐད་ཆ་འདིས་དུས་ཆེན་གྱི་ངོ་བོར་ཕོག་ཐུག་བཏང་བས་རེད། མི་རིགས་གང་བྱུང་གི་སྲོན་རྒྱུན་རིག་གནས་མི་ཡིན་པའི་དུས་ཆེན་གང་བྱུང་ནི། སྤྱིར་ཡིན་ན་ཉམས་ཞན་གྱི་མིའི་རིགས་༼ངལ་རྩོལ་བ། བུད་མེད་དང་བྱིས་པ། དབང་བོ་སྐྱོན་ཅན་༽ལ་སྲུང་སྐྱོབ་བྱེད་ཆེད་དུ་བཙུགས་པ་རེད།
དཔེར་ན། ལྔ་གཅིག་ངལ་རྩོལ་དུས་ཆེན་ནི། དུས་རབས་བཅུ་དགུ་པའི་བཟོ་བ་རྣམས་ཀྱི་བཟོ་གྲྭའི་བཤུ་གཞོག་ལ་ངོ་རྒོལ་བྱེད་ཆེད་དུ་ཁྲོམ་གཞུང་ནས་ང་རོ་སྒྲོག་པ་དང་ཁྲག་དྲོན་གྱིས་བརྗེས་པ་རེད། ཡང་དཔེར་ན། དྲུག་གཅིག་བྱིས་པའི་དུས་ཆེན་ནི། དམག་ཆེན་གཉིས་པའི་སྐབས་སུ་འཇར་མན་ནཱ་ཙེ་དམག་མིས་དུག་རླངས་ཀྱིས་བསད་པའི་བྱིས་པ་དེ་ཚོ་རྗེས་དྲན་བྱེད་ཆེད་དང་། དམག་འཁྲུག་གི་རྗེས་སུ་ལྟོགས་ཤི་ཐེབས་པའི་བྱིས་པ་དག་ལ་མྱ་ངན་ཞུ་ཆེད་དུ་ཚུགས་པ་རེད།
དོན་དངོས་སུ་བཤད་ན། གསུམ་བརྒྱད་བུད་མེད་དུས་ཆེན་ནི་སྐྱེས་པས་བསྩལ་བའི་དུས་ཆེན་མིན་པར། དུས་རབས་ཉི་ཤུ་བར་བུད་མེད་ཁྲི་སྟོང་མང་པོས་བུད་མེད་དབང་ཆའི་ལས་འགུལ་བརྒྱུད་དེ་བརྩོན་ལེན་ནས་ཐོབ་པའི་དུས་ཆེན་ཞིག་རེད། དེའི་རྒྱབ་ལོགས་སུ་ཁྱིམ་ཚང་གི་དྲག་ཤུགས་དང་། ལས་གནས་ལ་མཐོང་ཆུང་བྱེད་པ། བུད་མེད་ཀྱི་ཁྱིམ་ཚང་གི་གོ་གནས་ཚོད་འཛིན་བྱེད་པ་བཅས་ཀྱི་སྡུག་བསྔལ་འདུས་པ་ཡིན་ལ། བུད་མེད་གྲངས་ལས་འདས་པའི་ཁྲག་དང་མིག་ཆུའང་འདུས་ཡོད།
མི་རྒྱུ་ཅན་དང་། མི་དར་མ། མི་ཕོ་སྐྱེས་པ་བཅས་ཀྱི་དུས་ཆེན་མེད་པའི་རྒྱུ་མཚན་གང་ཡིན་ཟེར་ན། དེ་ནི་སྟོབས་ཅན་ལ་འཚོ་གནས་ཀྱི་མཐུན་རྐྱེན་བཟང་བས་ཡིན་ལ། གཉོམ་ཆུང་ཅན་ལ་འཚོ་གནས་ཀྱི་དགག་རྐྱེན་མང་བས་རེད། བུད་མེད་དུས་ཆེན་ཡིན་ནའང་འདྲ། རིག་གནས་ཀྱི་རང་བཞིན་མ་ཡིན་པའི་དུས་ཆེན་གཞན་དག་ཡིན་ནའང་འདྲ། ཐོག་མ་ཉིད་ནས་རྟེན་འབྲེལ་ཞུ་བར་སྤྱོད་པ་མིན་པར་དྲན་སྐུལ་བྱེད་སྤྱད་རེད། ཐོག་མ་ཉིད་ནས་སྲོལ་རྒྱུན་མིན་པའི་དུས་ཆེན་ཚུགས་དོན་ནི་སྤྱི་ཚོགས་ཀྱིས་ཉམ་ཆུང་བའི་མི་རྣམས་ཀྱི་དཀའ་ངལ་བློ་ལ་ངེས་པའི་ཆེད་དུ་ཡིན།
ང་ཚོའི་འཇིག་རྟེན་ཉིན་རེ་བཞིན་དྲང་སྙོམས་སུ་འགྱུར་བཞིན་ཡོད་མོད། འོན་ཀྱང་ད་དུང་ཉམ་ཆུང་བའི་མིང་སྲིང་ཧ་ཅང་མང་པོ་ཞིག་ལ། ཁོ་མོ་ཚོའི་འཚོ་གནས་ལ་ད་དུང་གཙིར་གནོན་བྱེད་བཞིན་ཡོད་པ་དང་། ཁོ་མོ་ཚོའི་སྤྱི་ཚོགས་གོ་གནས་ལ་ད་དུང་མཐོང་ཆུང་བྱེད་དམུས་ཡིན། གསུམ་བརྒྱད་བུད་མེད་དུས་ཆེན་ནི་བུད་མེད་ཀྱིས་རེ་འབོད་དང་། བརྩོན་ལེན། ངར་སྐད་སྒྲོག་པ་བཅས་ཀྱི་ཉིན་མོ་ཞིག་ཡིན་མོད། འོན་ཀྱང་ད་སྐབས་སུ་རྒྱལ་མོའི་དུས་ཆེན་དང་ལྷ་མོའི་དུས་ཆེན་སོགས་མིང་བཏགས་པ་དང་མཛེས་རྒྱན་སྤྲས་ནས་བུད་མེད་རྣམས་ལ་ཚུལ་ཆོས་ཀྱི་བསྟོད་པ་བྱས་ཡོད་ལ། བལྟས་ཚོད་ཀྱིས་ཁོ་མོ་ཚོར་འདྲ་མཉམ་གྱི་སྤྱི་ཚོགས་དབང་ཆ་དང་ཁྱིམ་ཚང་གོ་གནས་ཡོད་པ་ལྟ་བུའི་འཕྲུལ་སྣང་སྦྱིན་འོང་།
མེ་ཏོག་བཏིང་བའི་མཛེས་སྡུག་ལྡན་པའི་བགྲོད་ལམ་འོག་ཏུ། འགེབས་སྲུང་བྱས་ཡོད་པ་ནི་སྔར་བཞིན་གནས་པའི་གྲུབ་ཚུལ་རང་བཞིན་འདྲ་མཉམ་མིན་པ་结构性不平等དེ་རེད། བུད་མེད་དུས་ཆེན་གྱི་ཉིན་འདི་ལ་གུང་སེང་གཏོང་བ་དང་བསྔགས་བརྗོད་བྱེད་པ་དེ་དག་ནི་སྐྱེས་པ་ཚོའི་གུ་ཡང་བའི་གུས་ལུགས་ཤིག་ཏུ་ཆགས་ཡོད་ནའང་། མོ་དབང་ངམ་བུད་མེད་ཀྱི་སྤྱི་བྱིངས་དབང་ཆ་ནི་ཕྱི་ཚུལ་རྐྱང་རྐྱང་ནས་དར་བ་ལས། དོན་དངོས་སུ་ཕོ་མོ་འདྲ་མཉམ་གྱི་སྤྱི་ཚོགས་ཁོར་ཡུག་ད་དུང་ཡང་ཆགས་མི་འདུག
སྐྱེས་པ་ཚོས་བུད་མེད་ལ་སྲུང་སྐྱོབ་བྱེད་ཆེད་དུ་ཉེན་ཁ་ཆེ་བའི་ལས་རིགས་གཉེར་པར་བཀག་འགོག་བྱས། དེ་བས་བུད་མེད་ཀྱི་ལས་རིགས་བདམས་པའི་རང་དབང་བཙན་འཕྲོག་བྱས་ཡོད། སྐྱེས་པ་ཚོས་མཛངས་མའི་ཡོན་ཏན་སོགས་བརྩིས་ནས་མི་རྒྱུད་སྐྱེ་འཕེལ་ནི་བུད་མེད་ཀྱི་རིན་ཐང་མཐོ་ཤོས་སུ་བཞག་ཡོད། དེ་བས་བུད་མེད་རྣམས་ཀྱི་ཕྲུ་གུ་བཙའ་མིན་གྱི་དབང་ཆ་བཙན་འཕྲོག་བྱས་ཡོད།
དེ་རིང་བུད་མེད་དུས་ཆེན་གྱི་ཉིན་མོ་འདི་ལ་དངོས་གནས་བསམ་ཞིབ་བྱེད་རིན་ཡོད་པའི་གནད་དོན་ནི། བུད་མེད་ལ་ལས་ཀ་འདྲ་བར་ཐོབ་ཆ་འདྲ་བ་同工同酬ཐོབ་ཡོད་དམ། སྤྱི་ཚོགས་ཀྱིས་བུད་མེད་ལ་མཐོང་ཆུང་བྱས་པ་ཇེ་ཉུང་དུ་སོང་ཡོད་དམ། ཡང་ན་བུད་མེད་ལ་སྐྱེས་པ་དང་དངོས་གནས་འདྲ་མཉམ་ཡིན་པའི་སྤྱི་ཚོགས་ཀྱི་གོ་གནས་སྤྲད་ཡོད་དམ་སོགས་རེད།
དེ་བས། བུད་མེད་དུས་ཆེན་ནི་གང་དགའ་གང་སྐྱིད་ཀྱི་དཔལ་ལ་རོལ་ཆོག་པའི་ཉིན་མོ་ཞིག་མ་ཡིན་པར། དྲན་སྐུལ་གྱི་ནུས་པ་ལྡན་པའི་ཉིན་མོ་ཞིག་རེད། ལོ་རེའི་ཉིན་མོ་འདི་ལ། ང་ཚོས་བུ་མོའི་ལས་དབང་ལ་བསམ་གཞིག་གཏོང་འོས་སྟེ། བཙས་མ་ཐག་ནས་ཤི་ཉེན་ཡོད་པའི་བུ་མོ་དམར་འབྱར་དེ་ཚོ་བརྗེད་མི་རུང་། མུན་ནག་ཁྲོད་ན་བསམ་ཡིད་ལས་འདས་བའི་བཙན་གཡེམ་ཐེབས་ཀྱིན་པའི་བུ་མོ་དེ་ཚོ་བརྗེད་མི་རུང་། མི་ཚེ་ཕྱེད་ཀར་སྐེ་ལ་ལྕགས་ཐག་རྒྱབ་ཡོད་པའི་བུ་མོ་དེ(ཚོ་)བརྗེད་མི་རུང་།