ཤེས་ཡོན་ཅན་ཞིག་གི་ངོས་ནས་བཤད་ན། བསམ་བློ་ཕུལ་བྱུང་ཅན་ཞིག་ཏུ་འགྱུར་རྒྱུ་དེ་ཀུན་སྤྱོད་ཕུལ་བྱུང་ཅན་ཞིག་ཏུ་འགྱུར་རྒྱུ་ལས་དེ་བས་གལ་ཆེ་བ་ཡོད། གང་ཟག་སུ་ལའང་བསམ་བློ་མི་གཏོང་བར་རང་ཉིད་གླེན་པ་ཞིག་ཏུ་བསྒྱུར་བའི་རང་དབང་ཡོད་པ་སྨོས་ཅི་དགོས། དེའི་ཐད་ལ་ང་ལ་བསམ་འཆར་ཕྲན་ཙམ་ཡང་མེད། གནད་འགག་ནི་བསམ་བློ་གཏོང་བ་དང་རང་ཉིད་སྤྱང་གྲུང་འཛོམས་པར་བསྒྱུར་རྒྱུའི་རང་དབང་དེ་དོན་དངོས་ཐོག་ཡོད་འོས་མིན་ལ་ཐུག་ཡོད།
ལོ་ཉི་ཤུ་རྩ་ལྔའི་སྔོན་ལ་ང་རང་ཞིང་གྲོང་ནས་ངལ་རྩོལ་ཤེས་སྡེ་ཞུགས་སྐབས་དེབ་ཁ་ཤས་ཁྱེར་ཡོད་པའི་ནང་ནས་གཅིག་ནི་ཨའོ་ཝེ་ཏེའི་《གཟུགས་འགྱུར》ཞེས་པ་དེ་རེད། ང་ཚོའི་རུ་ཁག་ནང་གི་མི་རྣམས་ཀྱིས་དཔེ་དེབ་དེ་བསྐྱར་དུ་བལྟས་པ་དང་། བལྟས་བལྟས་མཐར། དེ་ནི་མཚོ་རྩྭ་ཞིག་དང་འདྲ་བ་ལྟ་བུ་གྱུར་འདུག ཕྱིས་སུ་རུ་ཁག་གཞན་པས་དེབ་དེ་གཡར་སོང་། ཕྱིས་སུ་ངས་ས་ཆ་མི་འདྲ་བ་འགའ་ནས་དེ་མཐོང་བྱུང་ལ། དེབ་དེའི་རྣམ་པ་ཇེ་སྡུག་ནས་ཇེ་སྡུག་རེད། རྣམ་པ་ཇེ་སྡུག་ཏུ་ཕྱིན་དྲགས་པས་དཔེ་ཆ་འདི་ཆེས་མཇུག་མཐར་ལྟ་ས་མི་འགྲོ་བ་ཆགས་འདུག་པ་ང་ལ་ཡིད་ཆེས་ཡོད། དུས་ད་ལྟ་ཡིན་རུང་ངས་དཔེ་ཆ་དེའི་ཡ་ང་བའི་རྣམ་པ་དེ་བརྗེད་ཐབས་མེད། ངལ་རྩོལ་ཤེས་སྡེ་ཁྲོད་དུ་ཞུགས་པའི་འཚོ་བ་ནི་དཀའ་ཚེགས་ཤིན་ཏུ་ཆེ་བ་ཞིག་ཡིན་པས། ལྟོ་བ་མི་རྒྱགས་པ་དང་། ས་ཆུ་མི་འཕྲོད་པས། མི་མང་པོ་ཞིག་ལ་ནད་ཕོག་པ་རེད། འོན་ཀྱང་སྡུག་བསྔལ་ཆེ་ཤོས་ནི་དཔེ་དེབ་ལ་བལྟ་རྒྱུ་མེད་པ་དེ་རེད། གལ་ཏེ་བལྟ་ས་འགྲོ་བའི་དཔེ་དེབ་ཧ་ཅང་མང་པོ་ཡོད་རྒྱུ་ན།《གཟུགས་འགྱུར》ཞེས་པའི་དཔེ་དེབ་དེའང་དེ་འདྲའི་ཡ་ང་བའི་ངང་ཚུལ་དུ་འགྱུར་མི་སྲིད། དེ་ལས་གཞན། ངལ་རྩོལ་ཤེས་སྡེ་ལ་བཞུགས་སྐབས་ད་རུང་བསམ་བློའི་སྤྲོ་སྣང་གང་ཡང་མེད། ང་ལ་ཡིད་ཆེས་ཡོད་། དེ་ནི་ང་མི་གཅིག་གི་མྱོང་བ་ཞིག་མིན་ཏེ། སྲོད་ཀྱི་དུས་སུ་ཁྱོད་ཀྱིས་ཁང་བའི་མདའ་གཡབ་འོག་ཏུ་བསྡད་ནས་ག་ལེར་གནམ་ངོ་ནག་ཐིང་ངེར་འགྱུར་བ་དེར་བལྟས་བསྡད་དུས། སེམས་ལ་ཁེར་ཆད་དང་སྐྱོ་སྣང་གིས་ཁེངས་ཤིང་།རང་ཉིད་ཀྱི་ཚེ་སྲོག་འཕྲོག་སོང་སྙམ་པའི་དོགས་པ་སྐྱེས་འོང་། སྐབས་དེར་ང་ནི་ན་གཞོན་ཞིག་ཡིན་མོད། འོན་ཀྱང་ང་ནི་འདི་ལྟར་འཚོ་བ་རོལ་ནས་རྒས་པར་སྐྲག ངས་ལྟ་ནས། བསམ་བློའི་སྤྲོ་སྣང་མེད་པར་མི་ཚེ་འཕྲོ་བརླག་བྱེད་པ་དེ་ནི་ཤི་བ་ལས་འཇིགས་སུ་རུང་བའི་དོན་ཞིག་རེད།
ང་ངལ་རྩོལ་ཤེས་སྡེ་རུ་ཞུགས་པའི་ས་ཆར་དམག་མིའི་འཐུས་ཚབ་པས་ང་ཚོར་བདག་དམ་བྱེད་ཀྱིན་ཡོད། ད་ལྟ་ངས་བལྟས་ན། ཁོ་ཚོ་ནི་མི་བཟང་རྐྱང་རྐྱང་ཞིག་ཡིན་མོད། ངའི་མི་ཚེ་ཁྲོད། ཁོང་ཚོའི་སྦྱིན་པའི་སྡུག་བསྔལ་ཚད་མེད་དེ་འདྲ་མི་གཞན་པས་ང་ལ་མྱངས་གིན་བཅུག་ཡོད་རྒྱུ་མ་རེད་སྙམ། དམག་མིའི་འཐུས་ཚབ་པ་ཚོའི་བསམ་པར་བསམ་བློའི་སྤྲོ་སྣང་ཞེས་པ་ནི་ཉིན་གཅིག་ལ་མའོ་ཙེ་ཏུང་དགོངས་པར་བརྟེན་ནས་འཛིན་གྱི་ཡོད་ཅིང་། སྔ་ཙམ་དགོངས་སྐོར་ཞུ་བ་དང་དགོང་མོ་སྙན་སེང་ཞུ་གི་ཡོད་པས་གལ་སྲིད་ཁོམ་པ་ཡོད་ན་ཁོ་ཚོ་རང་ཉིད་ཀྱི་“བཅིངས་འགྲོ་མི་དམངས་ཡག་གོ་འདུག༼བོད་སྐད༽”ཞེས་པའི་གླུ་གར་དེ་དག་རེད་སྙམ་གྱི་ཡོད། ང་གླུ་གར་དེ་དག་ལ་བསམ་འཆར་མེད། འོན་ཀྱང་ཐེངས་ཉི་ཤུ་ལྷག་ཙམ་ལ་བལྟས་རྗེས་སུན་སྣང་སྐྱེས་བྱུང་། གལ་ཏེ་ང་ཚོས་དཔེ་ཆར་ལྟ་བ་དེ་ཁོ་ཚོས་མཐོང་ཚེ། དེ་ནི་འཇིག་ཉེས་ཤིག་ཡིན་ལ། ཐ་ན་“ལུའུ་ཞིན”གྱི་དཔེ་ཆ་ལ་ཡང་བལྟས་མི་ཆོག མི་ཁ་ཤས་ཀྱིས་ཏག་ཏག་ལུའུ་ཞིན་གྱི་དཔེ་ཆ་བལྟས་མཐར་ཆད་པ་ནན་མོ་བཅད་བྱུང་། དེ་བས་ང་ཚོས་ཐབས་ཤེས་སྣ་ཚོགས་འཐེན་ནས་སྤྲོ་བ་ཅན་གྱི་དཔེ་དེབ་ལ་སྤྲོ་བ་མེད་པའི་དཔེ་དེབ་དག་གི་ཕྱི་སྤགས་སྦྱར་བ་ཡིན། ངས་ཆོས་ལུགས་ཀྱི་མཛད་སྒོ་ལྟ་བུའི་འཚོ་བ་སྐྱེལ་ཐབས་ཁྲོད་ནས་བསམ་བློའི་སྤྲོ་སྣང་ཐོབ་ཐུབ་པར་མི་འདོད་། དེར་བརྟེན་ཐོག་མཐའ་བར་གསུམ་དུ་སེམས་སྡུག་ཆེན་པོ་སྐྱེས་། འདི་ལྟ་བུའི་གཏམ་རྒྱུད་ནི་རྩོམ་པ་པོ་ཁ་ཤས་ཀྱི་ཀྱང་བྲིས་མྱོང་སྟེ། དཔེར་ན་ཚི་ཝེ་ཀེས་་བརྩམས་སྒྲུང་《མིག་མངས》ཞེས་པའི་སྣང་ཚུལ་འདི་ལྟ་བུ་ཁ་ཤས་བྲིས་མྱོང་མོད། འོན་ཀྱང་ངས་བལྟས་ན་ཁོས་སྡུག་བསྔལ་འདི་བྲིས་པ་ཧ་ཅང་དངོས་ཐོག་བདེན་འཚོལ་ཞིག་རེད་བསམ་གྱི་མེད། དེ་ལྟ་བུའི་སྡུག་བསྔལ་གྱི་རྩེ་མོར་མགྲོན་ཁང་དུ་བཀག་ནས་དཔེ་དེབ་ལ་བལྟས་མེད་པ་དང་།ཚད་དང་མཐུན་པའི་སྐད་ཆ་བཤད་པའི་རོགས་པ་མེད་པར།ཕྱི་རོལ་དུ་བཞག་ན།གནམ་སའི་བར་དུ་སྔར་བཞིན་ཁེར་རྐྱང་ཡིན་པ་དང་།ཁྱོད་དང་འདྲ་བར་སྡུག་བསྔལ་ཆེ་བའི་གྲོགས་པོ་དག་ལ་གདོང་གཏོད་དགོས། ང་ཚོའི་སྔོན་དུ་འཚོ་བ་སྐྱེལ་མྱོང་བའི་མཁས་དབང་གྲངས་མེད་ཅིག་དཔེར་ན་རོ་སུའུ་དང་།ཉིའུ་ཏུན། ཤག་སེ་པེར་ལ་སོགས་ཁོ་ཚོའི་བསམ་བློ་དང་གསུང་རྩོམ་དེས་ང་ཚོའི་སྡུག་བསྔལ་དེ་རིགས་གཞོལ་ཐུབ་མོད། འོན་ཀྱང་དེ་དུས་ང་རང་ཚོ་་ཁོ་ཚོའི་བསམ་བློ་དང་གསུང་རྩོམ་བར་ལ་དབྱེ་མཚམས་བཅད་ནས་ཁ་་ཐག་རིང་པོ་ཡོད། གལ་ཏེ་མི་ཞིག་ལ་བསམ་བློའི་ཁྲོད་ནས་སྤྲོ་སྣང་ཐོབ་དགོས་ན། ཁོའི་འདོད་པ་དང་པོ་ནི་སློབ་སྦྱོང་ཡིན་ངེས་རེད། བསམ་བློའི་སྤྲོ་སྣང་མེད་པའི་སྡུག་བསྔལ་དེ་རིགས་འགོག་པའི་ཐད་ཁོ་བོར་དངོས་གནས་བློ་རྩ་བརྟན་པོ་མེད་མོད། འོན་ཀྱང་བསམ་བློའི་ཆུ་ཚད་གཅིག་པུ་ལ་ཆ་བཞག་ན། ང་ནི་སྡུག་ཤོས་ཀྱི་གྲས་ཤིག་གཏན་ནས་མིན། དཔེར་བཞག་ནས་བཤད་ན། ལོ་ལྔ་ལ་སོན་དུས། ལུའོ་སུའུ་ནི་ཁེར་རྐྱང་ཡིན་ཞིང་སྐྱོ་སྣང་གི་སྣང་བ་ཞིག་སྐྱེས་ཏེ། གལ་ཏེ་ང་ལོ་བདུན་ཅུ་ལ་སོན་ཐུབ་ན། ངའི་མི་ཚེ་འདིའི་བོངས་ཚོད་ད་གཟོད་བཅུ་བཞི་ཡི་ནང་གི་གཅིག་ཡིན་པར་འདོད། འོན་ཀྱང་ཁོ་ལོ་ན་ཆེ་ཙམ་དུ་སོན་རྗེས། མཁས་པ་ཚོའི་བསམ་བློའི་མེ་སྟག་ལ་རེག་ན་བསམ་ཚུལ་བསྒྱུར། གལ་ཏེ་ཁོ་ཤེས་སྡེ་ངལ་རྩོལ་རུ་ཁག་ལ་ཞུགས་སུ་བཅུག་ན། ཕལ་ཆེར་རང་སྲོག་གཅོད་ངེས་རེད།
བསམ་གཞིག་གི་སྤྲོ་སྣང་གླེང་སྐབས། ངས་ཨ་ཕའི་སྡུག་བསྔལ་དྲན་བྱུང་། ཨ་ཕ་ནི་མཚན་ཉིད་རིག་པའི་སློབ་དཔོན་ཆེན་མོ་ཞིག་ཡིན་ལ། ལོ་རབས་ལྔ་བཅུ་དང་དྲུག་ཅུའི་སྐབས་སུ་མཚན་ཉིད་རིག་པའི་བསམ་གཞིག་གི་ལོ་རྒྱུས་ལ་ཞིབ་འཇུག་བྱེད་བཞིན་ཡོད། ལོ་ལོན་རྗེས་སུ། ཁོས་ང་ལ་ཁོང་གི་མི་ཚེ་གང་བོའི་རིག་གཞུང་གི་བརྒྱུད་རིམ་ནི་འཇིགས་རུང་གློག་བརྙན་ཞིག་དང་འདྲ་ཟེར། ཁོས་ལྟ་བ་གསར་བ་འདོན་སྐབས། རྟག་པར་ཇི་ལྟར་གཞུང་ཕྱོགས་ཀྱི་བསམ་བློའི་མ་ལག་གཅིག་གྱུར་ཅན་དང་མི་འགལ་བའི་ཐབས་ལམ་འཚོལ་དགོས་ཀྱི་ཡོད། དེ་ནི་བྱ་ཕོ་ཞིག་གིས་ཞིག་བརྩིས་བྱེད་པའི་ཁང་པ་ཆེན་པོའི་སྒོ་ར་ནང་ནས་སྒོ་ང་རུམ་ས་བཙལ་བ་ལྟ་བུ་རེད། ངཅི་ཨ་ཕ་ཁོང་ཚན་རིག་ལ་དགའ་བ་མ་ཟད། མཚན་ཉིད་རིག་པའི་གཞུང་ཆེན་ལ་སློབ་གཉེར་འབད་པ་ཆེན་པོ་བྱས་ཀྱང་། མི་ཚེ་གང་བོའི་ནང་དུ་བསམ་གཞིགས་ཀྱི་སྤྲོ་སྣང་རྙེད་མ་བྱུང་། དེ་ལས་ལྷག་པར་འཇིགས་སྐྲག་གྲངས་མེད་ཀྱི་གནས་སུ་ལྷུང་། ཁོང་གི་སྐུ་ཚེ་གང་བོའི་ཞིབ་འཇུག་འཚོལ་ཞིབ་ནི་གྱང་རོ་ཙམ་ལས་མེད་པ་དང་།《གཏན་ཚིགས་འཚོལ་ཞིབ》ཅེས་པའི་དཔེ་དེབ་ཅིག་ཁོང་ཚེ་ལས་འདས་རྗེས་ད་གཟོད་པར་དུ་སྐྲུན། ཚང་མས་མཁྱེན་གསལ་ལྟར། ཁོང་གི་མི་རབས་དེ་ལ་མི་ཚེ་གང་པོར་དཔེ་དེབ་གཅིག་བཞག་ན་གྲུབ་འབྲས་གྱ་མོན་པ་ཐོབ་སོང་ཟེར་ན་ཆོག དེའི་རྒྱུ་མཚན་ནི། ལོ་རབས་དེ་སྐབས་སུ་མི་ཁ་ཤས་ཀྱིས་ཀྲུང་གོ་བའི་བསམ་བློ་ལ་འབྲས་བུ་གཏན་ནས་མེད་པ་ཞིག་བཟོ་བསམ་གྱི་ཡོད་པས་རེད། ང་ཚོའི་རྒྱལ་ཁབ་འདིར། བསམ་བློ་ནི་སྤྲོ་སྣང་ཡིན་པར་འདོད་མཁན་ནི་ཤིན་ཏུ་ཉུང་ལ། ཤེས་ལྡན་པ་མང་པོ་ཞིག་བསམ་བློ་ཡོད་པར་བསྟེན་རྟག་པར་འཇིགས་སྣང་གིས་མནར་ཡོད། བག་ཆགས་ཟབ་མོ་དེའི་དབང་གིས། ད་ལྟ་ད་དུང་མི་མང་པོ་ཞིག་གིས་བསམ་བློ་ནི་སྤྲོ་སྣང་ཞིག་ཡིན་པར་འདོད་ཀྱིན་མེད།
རིག་གནས་གསར་བརྗེ་བྱས་རྗེས།སྐུ་ཞབས་ཞུས་ཧྲི་ཡིས་ཀི་ཏེ་པ་ཧེའི་ཚོད་དཔག་བྲིས་པའི་གནས་ཞུའི་རྩོམ་རིག་བཀླགས་ཤིང་། རྩོམ་ཡིག་དེ་བྲིས་པ་ནི་ཧ་ཅང་འཆར་ཡན་ལྡན་པ་ཞིག་རེད། མི་ཞིག་གིས་རང་ལ་ཆ་རྒྱུས་མེད་པའི་དོན་དག་བྲིས་ན་དེ་འདྲའི་འཆར་ཡན་བྱེད་སླ། ང་རང་ཉིད་ཀྱིས་བལྟས་ན། མཁས་དབང་ཞིག་གི་ངོས་ནས་བརྗོད་ན། ལས་རིགས་གཅིག་པའི་མི་སྣར་བསམ་བློ་བརྗེ་རེས་བྱེད་ཐུབ་པ་དེ་ནི་མ་མཐར་ཡང་སྤྲོ་སྣང་ཞིག་རེད། སྐུ་ཞབས་ཁྲེན་ཅིན་རུན་གཅིག་པུས་ཁང་མིག་ཆུང་ཆུང་ནང་ནས་རྩིས་རིག་གི་རྩིས་གཞི་ལེན་སྐབས། ཕྱི་རྒྱལ་གྱི་རྩིས་རིག་དུས་དེབ་ཁ་ཤས་ལ་བལྟ་རྒྱུ་དགོས་ལ། ད་དུང་རྩིས་རིག་ལས་རིགས་ཀྱི་ལས་རོགས་ཚོ་དང་གླེང་མོལ་བྱེད་པའི་གོ་སྐབས་ཡོད་དགོས་མོད། འོན་ཀྱང་ཁོ་ལ་མེད། དེའི་ཕྱིར་ཁོ་ནི་བདེ་སྐྱིད་ཅིག་ཡོད་རྒྱུ་མ་རེད། དེ་ལྟར་ཡིན་ནའང་ཁོ་རང་ལས་རྒྱུ་གང་ཡང་མེད་པའི་གང་ཟག་དང་བསྡུར་ན་ད་དུང་བདེ་སྐྱིད་ཡིན་ངེས། ཁོང་གི་བཏོན་པའི་གཏན་སྲོལ་དེ་ལོ་བཅུ་ལྷག་ལ་བདེན་དཔང་བྱས་ཡོད། བདེན་དཔང་བྱེད་སྐབས་སུ་སྤྲོ་བ་ཆེན་པོ་ཡོད་ངེས། འོན་ཀྱང་ཁུ་སིམ་མེར་ལས་རྒྱུ་ཅི་ཡང་མེད་པར་ས་སྟོང་ཞིག་ནས་ལུས་ན་ལྷག་ཏུ་དཀའ་བ་རེད། གལ་སྲིད་ཤེས་སྡེ་ངལ་རྩོལ་རུ་དཔུང་ལ་ཞུགས་སྐབས་ངས་གྲངས་རིག་ཤེས་ཀྱི་ཡོད་ན། སྐུ་ཞབས་ཁྲེན་ལགས་ལྟར་དེའི་ཕྱོགས་ལ་བསམ་བློ་གཏོང་བ་དང་སྡུག་རུས་རྒྱག་གི་རེད། ཐ་ན་མཐར་ཞིབ་འཇུག་གི་འབྲས་སུ་ཅི་ཡང་མ་ཐོབ་རུང་འགྱོད་པ་སྐྱེ་མི་སྲིད། མི་ཞིག་ལ་སློབ་སྦྱོང་དང་། བསམ་བློ་བརྗེ་རེས། ལག་རྗེས་འཇོག་པ་བཅས་ཀྱི་སྤྲོ་སྣང་གསུམ་པོ་དེ་འཕྲོག་ནའང་ངས་སྔར་བཞིན་ཡི་རང་ཆེན་པོ་བྱེད་ཀྱི་མེད། སྙིང་རྗེ་དེ་རིགས་ལ་ངས་འཕྲོག་བཅོམ་བྱས་པའི“བསམ་བློའི་སྤྲོ་སྣང་ལྡན་པའི”མི་དེ་དག་སོར་འཇོག་བྱས་ཡོད།
རིག་གནས་གསར་བརྗེ་ཡི་རྗེས་སུ། ངས་ད་དུང་སྐུ་ཞབས་ཨ་ཁྲེང་གིས་བྲིས་པའི་གཞོན་ནུ་ཤེས་ཡོན་ཅན་གྱིས་མིག་མངས་རྩེ་བའི་བརྩམས་སྒྲུང་མཐོང་བྱུང་ལ། བརྩམས་སྒྲུང་དེ་ཡང་ཧ་ཅང་འཆར་ཡན་ལྡན་པ་ཞིག་བྲིས་འདུག ངའི་མི་ཚེ་འདིའི་ནང་གི་མིག་མངས་རྩེད་པའི་དུས་ཚོད་ལྔ་ཆའི་བཞི་ནི་ཤེས་སྡེ་ངལ་རྩོལ་རུ་དཔུང་ནས་བཏང་བ་ཡིན། ད་ལྟ་མིག་མངས་རྩེ་བ་དང་ཤེས་སྡེ་ངལ་རྩོལ་རུ་དཔུང་དང་འབྲེལ་བའི་སྙན་ཚིག་གཉིས་མཉམ་དུ་བྲིས་ཡོད་པ་མཐོང་ན་ངའི་ལུས་ཁམས་ཐོག་ལ་ཞེན་པ་ལོག་གི་རེད། ལས་ཀ་མེད་པའི་དབང་གིས་མིག་མངས་རྩེད་དེ་ནི་ངོ་བོ་ཆ་ནས་བཤད་ན་ལག་གཡེམ་བྱེད་པ་དང་ཁྱད་པར་ཆེན་པོ་མེད། ངས་འདི་འདྲའི་སྙིང་བོ་མེད་པའི་དོན་དག་བརྩམས་སྒྲུང་ནང་དུ་གཏན་ནས་འབྲི་མི་འདོད།
གལ་ཏེ་མི་གཅིག་གིས་ཉིན་རེར་ཟ་མ་གཅིག་འདྲ་ཟ་བ་དང་། ལས་ཀ་གཅིག་འདྲ་བྱེད་པ། དཔེ་སྟོན་ཟློས་གར་བརྒྱད་མགོ་མཇུག་མ་ལུས་པར་ཕར་བལྟ་ཚུར་བལྟ་བཅས་བྱས་ན། གོང་གི་ཚིག་དེ་ཐོས་རྗེས་ཚིག་རྗེས་མ་གསལ་བོར་ཤེས་པའི་ཚད་དུ་ཐོན་ན།ངས་མི་དེ་ལ་སྙིང་རྗེ་ཆེ་ཤོས་བྱ་ངེས། ངས་ལུའོ་སུའུ་ཡི་སྐད་ཆ“ཧེ་བག་ཆེ་བ་དང་རྣམ་པ་མང་བ་དེ་ནི་བདེ་སྐྱིད་ཀྱི་འབྱུང་ཁུངས་ཤིག་ཡིན་པ་ངེས་པར་དུ་ཤེས་དགོས”ཞེས་བཤད་པའི་སྐད་ཆ་དེ་ལ་མོས་མཐུན་ཆེན་པོ་བྱེད་ཀྱི་ཡོད། རེད། འདྲ་མིན་གྱི་རྣམ་པ་མང་ཆེ་བ་ནི་བསམ་བློ་འདྲ་མིན་བཏང་སྟེ་གསར་སྐྲུན་བྱས་པ་རེད། ཡིན་ནའང་མི་ཁ་ཤས་ཀྱིས་ང་ཚོའི་བསམ་འཆར་ལ་ཡིད་མཐུན་བྱེད་ཀྱི་མེད་པ་དེ་ངས་ཤེས་ཀྱི་ཡོད། ཁོ་ཚོས་བསམ་པར། ངེས་བར་དུ་སྣ་གཅིག་ནི་བདེ་སྐྱིད་ཀྱི་འབྱུང་ཁུངས་ཡིན་པར་འདོད། ལའོ་ཙེས་མི་ཚང་མ“བསམ་པ་ཟོལ་ཅན་དང་གྲོད་པ་འདང་ངེས”བྱེད་དུ་འཇུག་དགོས་ཞེས་བཤད་ཡོད། ངས་ཉན་ན་དེ་འདྲའི་དགའ་བོ་མེད། ཧན་རྒྱལ་རབས་ཀྱི་རུའུ་ལུགས་པ་ཚོས་་མཁས་བརྒྱ་གནས་དབྱུང་བཏང་བ་དང་།རུའུ་ལུགས་གཅིག་པུར་བརྩི་བཀུར་བྱེད་པ་དེ་ངས་བལྟས་ན་ཧ་ཅང་ཐ་ཤལ་གྱི་བྱ་སྤྱོད་ཅིག་རེད། རྗེ་སི་མོར་གྱིས་ཞིབ་ཕྲ་ཆ་ཚང་བའི་རྟོག་བཟོ་ཆ་འགྲིག་རྒྱལ་ཁབ་ཅིག་གི་བསམ་ཚོད་བྱས་མོད། འོན་ཀྱང་ང་ནི་སྐུ་ཞབས་ལུའོ་སུའུ་དང་འདྲ་བར་དེའི་ཁྲོད་དུ་འཚོ་བ་གཏན་ནས་སྐྱེལ་འདོད་མེད། ཤེས་སྡེ་ངལ་རྩོལ་གྱི་སྐབས་སུ་དམག་མི་བཟང་པོ་འགའ་ཡོད་ཅིང་། ཁོ་ཚོས་ཤེས་བྱ་དང་བསམ་བློ་ཡོད་ཚད་ངའི་ཀླད་པའི་ནང་ནས་ཕྱིར་སྐྲོད་རྩིས་བྱེད་པ་དང་། མ་ཟད་ཤོག་ངོས་270ཙམ་ལས་མེད་པའི་དཔེ་དེབ་དམར་པོདེ་ཡིས་ངའི་བསམ་བློ་ཁེངས་སུ་བཅུག་ན་བསམ་ཀྱིན་ཡོད། འཚོ་བའི་ཕྱོགས་གཞན་དག་ལ་ཆ་མཚོན་ན། སྣ་གཅིག་ཅན་དང་འགྱུར་མེད་ཅན་གྱི་དངོས་ཡོད་གནས་བབ་ལ་ངེས་པར་དུ་བཟོད་བསྲན་བྱེད་དགོས་མོད།འོན་ཀྱང་བསམ་བློ་སྣ་གཅིག་ཅན་དང་འགྱུར་མེད་ཅན་ནི་གཟོད་བསྲན་བྱེད་དཀའ་བ་ཞིག་རེད། མི་བསམ་དགུ་བསམ་བྱས་ན་བསམ་བློའི་སྤྲོ་བ་མི་འདུག སྤྲོ་བ་ལྡན་པའི་བསམ་གཞིག་ནི་གནས་ལུགས་ཡོད་པ་མ་ཟད་གཞན་གྱི་བློ་ཡུལ་ལས་འདས་བ་དེ་དག་རེད། ང་ཚོའི་འཚོ་བའི་ཁྲོད་དུ། ཆེས་མི་འོས་པ་ནི་མི་ཁ་ཤས་ཀྱིས་བློ་ཡུལ་ལས་འདས་པའི་བསམ་བློ་དང་སྤྲོ་སྣང་དེ་དང་ལེན་མི་བྱས་པ་དེ་རེད།
ངའི་སེམས་ལ་རང་ཉིད་ལ་སྤྲོ་སྣང་ཆེ་ཤོས་བྱུང་བའི་དུས་སྐབས་ནི་ཐོག་མར་སློབ་གྲྭ་ཆེ་བར་འགྲོ་སྐབས་ཡིན། ཚན་རིག་ནི་ངའི་ངོས་ནས་བཤད་ན་ངོ་མཚར་ཆེ་བའི་བྱ་བ་ཞིག་ཡིན་པར་མ་ཟད། དེ་ནི་རྟག་པར་གཏན་ཚིགས་ཆ་ཚང་ཞིང་སྐྱོན་འདོགས་བྱེད་ས་མེད་པ་ཞིག་ཀྱང་ཡིན་པས་རེད། དེ་ནི་འཇིག་རྟེན་འདིའི་ཐོག་ཏུ་མཐོང་དཀོན་པ་ཞིག་རེད། དེ་དང་ཆབས་ཅིག སྔོན་བྱོན་ཚན་རིག་མཁས་ཅན་གྱི་ཁྱད་དུ་འཕགས་པའི་བློ་རིག་ཤེས་རྟོགས་བྱེད་ཐུབ། དེ་ནི་མིག་མངས་མཁས་པ་ཞིག་དང་མཉམ་དུ་མིག་མངས་རྩེད་བ་དང་འདྲ་བར་རང་ཉིད་ཕམ་པར་བརྒྱབ་ཀྱང་མིག་མངས་མཁས་པའི་ཐབས་ཤེས་དེ་སྤྱོང་བའི་གོ་སྐལ་ལྡན་པ་དང་འདྲ། ངའི་སློབ་གྲོགས་ཀྱི་གྲས་སུ་ང་དང་ལོ་ཚོད་གཅིག་པ་དང་ཉམས་མྱོང་གཅིག་པ་ཡོད་པ་དེ་ཚོར། ང་དང་འདྲ་བའི་མྱོང་བ་ཡོད་ངེས། ནམ་རྒྱུན་འཚོ་བའི་ཁྲོད་ཀྱི་བྱ་སྤྱོད་ཁ་ཤས་སྟེ། དཔེར་ན་ཟ་མ་ཟ་བ། གཅིན་སྐྱག་གཏོང་བ། འཁྲིག་སྦྱོར་སོགས་ཀྱིས་ཀྱང་སྤྲོ་སྣང་སྟེར་ཐུབ་མོད། འོན་ཀྱང་སྤྲོ་སྣང་དེ་དག་སྟབས་བདེ་དྲགས་པས། བསམ་བློའི་སྤྲོ་སྣང་དང་བསྡུར་ཐབས་མེད། སྒྱུ་རྩལ་གྱིས་ཀྱང་སྤྲོ་སྣང་དེ་འདྲ་ཁྱེར་ཡོང་ཐུབ་མོད། འོན་ཀྱང་ངེས་པར་དུ་སློབ་དཔོན་ཆེན་མོའི་ཆུ་ཚད་འདྲ་བའི་སྒྱུ་རྩལ་པ་ཞིག་ཡིན་དགོས། དཔེར་ན་ཉིའུ་ཏུན་དང་། ལའེ་པུའུ་ཉི་ཚི། ཨའེ་དབྱིན་སི་ཐན་བཅས་ལྟ་བུའི་རིམ་པ་ལྡན་པའི་མི་སྣ་གཟོད་སྒྱུ་རྩལ་གྱི་སྤྲོད་ཉམས་སུ་ལེན་ཐུབ། སྐབས་དེའི་ཀྲུང་གོའི་སྒྱུ་རྩལ་མཁས་པ་རྣམས་ལ་ད་དུང་རིམ་པ་དེ་འདྲར་་སླེབས་ཡོད་མཁན་གཅིག་ཀྱང་མེད། ངས་དྲང་མོར་བཤད་ན། བསམ་བློའི་སྤྲོ་བ་འཕེལ་ཐུབ་པ་ནི་མིའི་རིགས་ཀྱི་བློ་རིག་ཆེས་མཐོ་བའི་ཐོན་དངོས་ཡིན། དེ་ལས་རིམ་པ་གཅིག་གིས་དམའ་བའི་དངོས་པོ་ཡིས་མི་རྣམས་ལ་སྡུག་བསྔལ་བཟོ་སྲིད། སྤུས་ཚད་དམའ་བའི་སྤྲོ་སྣང་དེ་རིགས་ནི་ཁེ་ཕན་ལ་བརྟེན་པའི་བསམ་ཚུལ་སྣ་ཚོགས་ཙམ་རེད།
མིའི་རིགས་ཀྱི་བསམ་གཞིགས་ཀྱི་དབང་པོར（བསམ་བློ）“སྤེལ་བའི”བསམ་བློ་གཏོང་དགོས་པ་དེ་ཡར་ངོའི་ཟླ་བཞིན་གོང་ནས་གོང་དུ་འཕེལ་བཞིན་ཡོད། ངའི་བསམ་པར་ཀླད་པ་ནི་བདེ་སྐྱིད་ཆེན་པོ་ཤེས་ཚོར་ཐུབ་པའི་དབང་པོ་ཞིག་ཡིན་ཞིང་།ཕན་ཐོགས་པའི་བསམ་ཚུལ་དེའི་ཐོག་ཏུ་བཞག་ཡོད་པས་དེ་ནི་དོགས་པ་ཅན་གྱི་བྱ་སྤྱོད་ཅིག་རེད་སྙམ། མི་ལ་ལ་ཞིག་གིས་དེ་ནི་འགྲན་རྩོད་བྱེད་པའི་ལག་ཆ་ཡིན་ཟེར། དེའི་ཕྱིར་མིས་འཇིག་རྟེན་དུ་མ་བྱུང་སྔོན་ལ་སྐད་ཆ་བཤད་ཤེས་པ་དང་། ལོ་གསུམ་གྱི་སྔོན་ལ་ཐང་རྒྱལ་རབས་ཀྱི་སྙན་ངག་བློར་འཛིན་དགོས། གལ་ཏེ་འདི་ལྟར་བྱས་ནས་ཀླད་པ་བཀོལ་སྤྱོད་བྱས་ན། ད་དུང་གང་ཟག་རང་ལ་བདེ་སྐྱིད་ཐོབ་ཐུབ་པ་ནི་དངོས་གནས་བསམ་ཡུལ་ལས་འདས་པ་ཞིག་རེད། ཤེས་བྱ་ཡིས་བདེ་སྐྱིད་བསྐྲུན་ཐུབ་མོད། འོན་ཀྱང་གལ་ཏེ་ཤེས་བྱ་ནི་སྨན་རིལ་བུ་ལྟར་ཁོག་ལ་བླུགས་ན་སྤྲོ་བ་མེད་པར་འགྱུར་ངེས། གལ་ཏེ་མི་ཞིག་གིས་རང་གི་ཕྲུ་གུའི་སློབ་གསོ་ལ་ལྟ་སྟངས་དེ་འདྲ་བཟུང་ཡོད་ན། ངས་ཕྲུ་གུ་དེ་ལ་སྙིང་རྗེ་ཚད་མེད་སྐྱེས་སྲིད། མི་ལ་ལའི་བསམ་པར། ཤེས་བྱ་ནི་རང་ཉིད་མི་བཟང་ཞིག་ཡིན་པའི་མཚོན་བྱེད་ལག་ཆ་ཡིན་པར་འདོད། དེ་བས་དེའི་དོན་དུ་ངེས་པར་དུ་ལེགས་བཤད་དང་ལུང་འཛིན་ཁག་གཅིག་བློར་འཛིན་དགོས་རྒྱུ་ཡོད། དོན་དངོས་ཐོག་ངས་དེ་ནི་གཡོ་ཟོལ་ཆེ་བ་ཞིག་ཡིན་སྙམ་གྱི་ཡོད། གཡོ་ཟོལ་གྱི་བྱེད་ཐབས་འདིས་ང་ལ་སྡུག་བསྔལ་ངེས་ཅན་ཞིག་མྱོང་དུ་བཅུག འོན་ཀྱང་དེ་ནི་བཟོད་མི་ཐུབ་པ་ཞིག་མ་རེད། སྡུག་བསྔལ་ཆེ་ཤོས་ནི་རྟག་པར་མི་འགའ་ཞིག་གིས་རྒྱུ་མཚན་སྣ་ཚོགས་ལ་བརྟེན་ནས་ཁྱད་པར་དང་ཧེ་བག་དེ་མེད་པ་བཟོ་དགོས་བསམས་ཀྱིན་ཡོད་པ་རེད། ཁྱད་པར་དང་ཧེ་བག་ནི་བདེ་སྐྱིད་ཀྱི་རྨང་གཞི་ཡིན་ནོ།། མི་དེ་ཚོས་དེ་ལྟར་བྱེད་འདོད་པའི་རྒྱུ་མཚན་གལ་ཆེ་ཤོས་ནི་ཀུན་སྤྱོད་ཡིན་པ་དང་། དེ་ལས་གནད་ལ་འཁེལ་བ་ཞིག་བཤད་ན་དེ་ནི་དགེ་སྐྱོན་གྱི་ཐད་ནས་ལངས་ཕྱོགས་བཟུང་ཡོད་པ་རེད། དེར་བརྟེན་ཁོ་ཚོས་བསམ་བློ་རིགས་དང་རིགས་སོ་སོར་ཕྱེ་ནས་བཟང་ངན་གྱི་དབྱེ་བ་འབྱེད་ཀྱི་ཡོད་མོད། འོན་ཀྱང་སྤྱོད་བྱའི་ཚད་གཞི་ལ་དོགས་པ་ཟ་འོས། ཁོ་ཚོའི་བསམ་པར། གལ་ཏེ་མི་རྣམས་ཀྱི་ཀླད་པའི་ནང་དུ་ལེགས་པའི་ཆ་གང་བླུགས་ན་གནམ་འོག་ཞི་བདེ་ཡོང་ཐུབ་སྙམ། དེར་བརྟེན། ཁོ་ཚོས་སྐབས་དེའི་དམག་མིའི་འཐུས་ཚབ་པས་ང་ཚོར་འཛིན་པའི་རྣམ་འགྱུར་བཟུང་ནས་ན་གཞོན་ཚོའི་སྤྱོད་ཚུལ་ལ་ཚོད་འཛིན་རྩིས་ཡོད། གལ་ཏེ་བསམ་བློ་ནི་མིའི་རིགས་ཀྱི་འཚོ་བའི་ཕྱོགས་གཙོ་བོ་ཞིག་ཡིན་ན། དགེ་སྐྱོན་གྱི་ཀུན་སློང་ལ་བརྟེན་ནས་མིའི་བསམ་བློ་བསྒྱུར་དགོས་མོད། དེ་ནི་དཔེར་ན་མི་ཞིག་གི་བདེ་སྐྱིད་ཀྱི་ཆེད་དུ་ཁོ་རང་བསད་པ་དང་འདྲ་བར། གནས་ལུགས་དང་མི་མཐུན་པ་ཞིག་རེད།
མི་ལ་ལ་ཞིག་གིས་བསམ་བློའི་གོ་རྟོགས་མཐོན་པོ་ལྡན་དགོས་པ་དང་། སྤུས་ཀ་ཞན་པའི་བསམ་བློ་འདོར་དགོས་སྙམ། བཤད་ཚུལ་དེ་རིགས་ལ་ཉན་ན་སྙན་མོད། འོན་ཀྱང་ང་ལ་འཇིགས་སྐྲག་སྐྱེས་སུ་བཅུག གང་ལགས་ཤེ་ན། བླ་ན་མེད་པའི་བསམ་བློ་དང་དམའ་བའི་བསམ་བློའི་བསྡོམས་འབོར་ནི་ང་རང་ཉིད་ཡིན་པས། གལ་སྲིད་ཆ་ཤས་ཤིག་མེད་པར་བཟོས་ན་ངའི་ངའི་ངོ་བ་ཐག་ཆོད་བྱེད་པར་དཀའ་ལས་བཟོ་ངེས་རེད། གལ་ཏེ་མི་ཞིག་གི་བསམ་བློ་ཡ་རབས་ཡིན་པའི་དབང་དུ་བཏང་ན་བདག་གིས་དེར་གུས་བཀུར་བྱེད་སྲིད། འོན་ཀྱང་ཁྱོད་ཀྱིས་མི་དེའི་བསམ་བློ་བཟང་ཟེརན་ནས་བཙན་དབང་གིས་ངའི་ཀླད་པ་ཁོ་ལ་བརྗེ་དགོས་བསམས་ན། ང་གཏན་ནས་འཐད་པ་བྱུང་མི་སྲིད། མི་འཚོ་བཞིན་ཡོད་པས་ན། མི་དེར་བསམ་བློའི་རྒྱུན་འཁྱོངས་བྱེད་ཆོག་པའི་དབང་ཆ་ཡོད། ཡང་གཅིག་བཤད་ན། བསམ་བློ་ལེགས་པ་དང་དམན་པ་ནི་མི་རེ་རེ་ཡིས་རང་ཉིད་ཀྱི་ལངས་ཕྱོགས་ལ་བརྟེན་ནས་བརྡར་ཤ་གཅོད་ཀྱིན་ཡོད་པ་དེ་རེད། གལ་ཏེ་ངས་གཞན་གྱི་ཚད་གཞི་ཡོངས་རྫོགས་དང་ལེན་བྱས་ན། བྱ་མོ་ཞིག་གིས་ངའི་ཀླད་པའི་ནང་ལ་སྒོ་ང་གཏོང་དུ་བཅུག་པ་དང་གཉིས་སུ་མེད། འོན་ཀྱང་ངས་རྟག་པར་རང་ཉིད་ཀྱི་བླ་ན་མེད་པའི་མགོ་བོ་ནི་བྱ་ཕོའི་ར་བ་ཞིག་ཡིན་མིན་ལ་དོགས་ཟོན་བྱེད་ཀྱིན་ཡོད། སྐབས་དེ་དུས་དམག་དཔུང་གི་འཐུས་ཚབ་པའི་མཐོང་ལམ་དུ་ང་ཡང་གོ་རྟོགས་དང་བསམ་བློ་ཧ་ཅང་དམའ་བའི་མི་ཞིག་ཡིན་ཞིང་། ཁོང་ཚོས་རང་ཉིད་ཀྱི་བསམ་བློ་གཏོང་སྟངས་དང་འཚོ་བ་སྐྱེལ་སྟངས་དག་ང་ཚོར་བཙན་འགེལ་བྱས། དེ་ནི་ཀླད་པ་སྤོ་སྒྱུར་བྱས་པ་ཞིག་རེད། མཚན་ཉིད་རིག་པ་བ་ཧྥེ་ཨར་ཏིན་གྱིས་བཤད་རྒྱུར། ང་རང་གི་རེ་བ་ནི་ང་རང་མི་དེ་བས་ཀྱང་བཟང་པོ་ཞིག་ཏུ་འགྱུར་རྒྱུ་དེ་ལོས་ཡིན། འོན་ཀྱང་བསམ་པ་བཟང་པོ་དེ་རིགས་ནི་ང་རང་དེ་བས་སྤྱང་པོར་གྱུར་པ་ལས་བྱུང་བ་ཞིག་ཡིན་པ་ལས། དེ་ལས་ལྡོག་པར་བཙན་ཤུགས་སམ་རྩུབ་སྤྱོད་བཟང་ནས་ཀླད་པ་སྤོ་སྒྱུར་གཏོང་བ་ཞིག་གཏན་ནས་མིན། དེ་བས་ཧོ་ལ་ཁེ་ལི་ཐེས་སྔ་ས་ནས་བཤད་མྱོང་བར། དགེ་བ་དང་སྡིག་པ་གཉིས་གཅིག་ཡིན་ཏེ། གྱེན་དང་ཐུར་ནི་ལམ་གཅིག་གི་ཕྱོགས་གཉིས་ཡིན་པ་དང་འདྲ་བ་རེད། གང་ཞིག་ངན་ཡིན་པ་མ་ཤེས་ན། གང་ཞིག་བཟང་མིན་ག་ལ་ཤེས།
གལ་སྲིད་ང་གནམ་བདག་ལ་ཡིད་ཆེས་（དོན་དམ་དུ་ང་ནི་ཡིད་མི་ཆེས་）ཡོད་རྒྱུ་ན། དགེ་སྡིག་གི་ཁྱད་པར་འབྱེད་མི་ནུས་པར་སེམས་ཁྲལ་བྱེད་བཞིན་ཡོད་ན། ངས་གནམ་བདག་ལ་ང་རང་སྤྱང་པོ་ཞིག་ཏུ་བསྒྱུར་ནས། དགེ་སྡུག་གི་ཁྱད་པར་གསལ་འབྱེད་བྱེད་ཐུབ་ངེས་ཀྱི་ཚད་ལ་སླེབས་ཐུབ་པར་རེ་བ་འདོན་ངེས་ཡིན་པ་ལས། གླེན་རྟགས་བསྟན་ནས་མི་གཤིས་བཟང་ངན་གྱི་ཚད་གཞིའི་ཚད་ཁྲིད་བྱེད་མི་འདོད། གལ་ཏེ་དཀོན་མཆོག་གིས་མི་གཤིས་བཟང་ངན་གྱི་ཤན་འབྱེད་པའི་ལས་འགན་སྒྲུབ་ཏུ་བཅུག་ན། ངས་གནམ་བདག་ལ་ཤན་འབྱེད་པའི་ལས་ཀ་དེ་དོར་ནས། ང་རང་དམྱལ་བར་བསྐྱེལ་རོགས་ཞེས་བློ་བརྟན་འགྱུར་མེད་ངང་རེ་བ་ཞུ་ངེས།
ང་རང་ཆེས་བསམ་པ་བཟང་བའི་སྐབས་ནི། གཞོན་ནུ་ཤེས་ཡོན་ཅན་ཡིན་པའི་སྐབས་དེར་ངས་མིའི་རིགས་ཡོངས་རྫོགས་བཅིངས་འགྲོལ་གཏོང་དགོས་བསམས་ཀྱང་རང་ཉིད་ཀྱི་ཁེ་ཕན་ཆུང་ཆུང་དེ་ཡིད་ལ་གཏན་ནས་དྲན་མ་བྱུང་། སྐབས་དེར་ང་རང་གླེན་རྟགས་ཧ་ཅང་ཆེ་བས། གྲུབ་འབྲས་གང་ཡང་ཐོབ་མེད་པར་མ་ཟད། ད་དུང་སྐྱོན་ཆ་མི་ཉུང་བ་ཞིག་གོམས་ལོབ་བྱུང་ཡོད། ད་ལྟ་ངའི་བསམ་པར་བླུན་རྨོངས་ནི་སྡུག་བསྔལ་ཆེ་ཤོས་ཤིག་རེད་སྙམ། དེས་མིའི་རིགས་ཀྱི་རིག་ནུས་ཇེ་དམའ་རུ་གཏོང་སྲིད་པས་ཉེས་པ་ཧ་ཅང་ཆེ། བཟང་ངན་གྱི་དབྱེ་བ་མེད་པར་ངན་ལ་ངན་ལམ་མེད་ན། དེ་ནི་མི་བཟང་བོའི་གྱོང་གུན་ཆེན་པོ་ཞིག་རེད། དེ་བས། ང་ཚོས་ལྷོད་གཡེང་མེད་པར་དགེ་བ་སྒྲུབ་མཁན་ལ་དོགས་ཟོན་བྱེད་དགོས། གལ་ཏེ་ང་ཚོས་བཙན་གཡེམ་ཆེན་པོ་བྱེད་མཁན་གྱིས་མགོ་སྐོར་བ་དང་སེམས་ཁམས་ད་དུང་དོ་མཉམ་ཡོང་ཐུབ་ན། སེམས་བཟང་བའི་བློ་རིག་ཞན་པའི་མིས་མགོ་སྐོར་བཏང་ན་ངས་རང་ཉིད་ལ་གཟོད་སྒོམ་བྱེད་དཀའ་བ་རེད།
གལ་ཏེ་ང་ལ་རང་ཉིད་ཆེས་མི་བཟང་བའི་དུས་སུ་བཞག་ན། དེ་ནི་ད་ལྟ་རེད། ཕལ་ཆེར་སློབ་གསོ་ཕྲན་བུ་ཐེབས་པའི་རྐྱེན་གྱིས་ཡིན་སྲིད་ལ། ཕལ་ཆེར་ནར་སོན་པའི་རྐྱེན་གྱིས་ཀྱང་ཡིན་སྲིད། གང་ལྟར་ཁྱོད་ཀྱིས་ང་ལ་མི་སུ་ཞིག་བཅིངས་འགྲོལ་གཏོང་དུ་འཇུག་དགོས་ཟེར་ན། ངས་སྔོན་ལ་མི་དེ་དག་སུ་ཡིན་ཞེས་སྐད་ཆ་དྲིས་ཆོག ཅིའི་ཕྱིར་རོགས་རམ་བྱེད་དགོས་པ་དང་། དེ་ནས་ཁོ་ཚོར་རོགས་རམ་བྱས་ན་ངའི་ནུས་པ་ཐོན་ཐུབ་མིན་དང་། མཇུག་ཏུ་ངས་ད་དུང་བསམ་བློ་ཞིག་གཏོང་དགོས་པ་སྟེ།རང་ཉིད་ཡུན་ནན་དུ་བསྐྱོད་ནས་ས་དོང་བརྐོས་ན་ལས་དོན་ཐད་ཁ་གསབ་བྱེད་དགོས་མིན་ལ་བསམ་བློ་གཏོང་དགོས། འདི་ལྟར་བསམ་བློ་བཏང་ན།ངས་ཏན་ཏན་རུ་ཁག་ལ་ཞུགས་མི་འདོད། འགོ་ཁྲིད་ཀྱིས་ཨུ་ཚུགས་ཀྱིས་ང་འགྲོ་རུ་བཅུག་ཀྱང་ང་ད་དུང་འགྲོ་དགོས་ཀྱི་ཡོད།འོན་ཀྱང་དེའི་རྗེས་ལ་རི་སྔོན་པོ་བརྐོས་ནས་ས་ཆུ་ཤོར་བ་སོགས་ཀྱི་ཉེས་པ་བསགས་པས་ང་ལ་མེད། མི་ཕལ་ཆེ་བས་སེམས་བཟང་ལ་བློ་རིག་ཞན་པའི་མི་ནི་ཉེས་མེད་ཡིན་པར་འདོད། གལ་ཏེ་རིག་པ་དམའ་པོ་དེ་རིགས་ལྷན་སྐྱེས་ཀྱིས་བཟོས་པ་ཡིན་ན།ང་མོས་མཐུན་ཡོད། འོན་ཀྱང་མིས་རང་ཉིད་ཀྱི་རིག་སྟོབས་སྤེལ་ཐུབ་ཀྱི་ཡོད་སྟབས་གནངས་ཉིན་བློ་རིག་དམའ་བའི་རྐྱེན་གྱིས་ཉེས་པ་མེད་མཁན་ལ་བརྩི་མི་ཐུབ།དེ་ནས་བཤད་ན།གླེན་པ་ཡིན་ཁུལ་བྱེད་པ་ལས་སྟབས་བདེ་བ་མེད། སྡོམ་ཚིག་དེ་ནི་སྐབས་དེའི་དམག་མིའི་འཐུས་ཚབ་པ་རྣམས་ནི་མི་ངན་ཡིན་ཁུལ་བྱེད་མཁན་ཤ་སྟག་རེད་ཅེས་གཏན་ནས་བཤད་ཀྱི་མེད།ངས་ད་ལྟའང་ཁོ་ཚོ་ནི་མི་བཟང་ཞིག་ཡིན་པར་ཡིད་ཆེས་བྱེད་ཀྱི་ཡོད། ངའི་སྡོམ་ཚིག་ནི།བཟང་ངན་གང་ཡིན་བརྡར་ཤ་གཅོད་ཐུབ་པར་ཆ་བཞག་ན།ཡིན་མིན་གྱི་དབྱེ་བ་འབྱེད་པའི་སྔོན་འགྲོའི་ཆ་རྐྱེན་ནི་བློ་རིག་འཕེལ་རྒྱས་གཏོང་རྒྱུ་དང་ཤེས་བྱ་རྒྱ་ཆེར་བསྐྱེད་རྒྱུ་དེ་ཡིན། འོན་ཀྱང་།ཁྱོད་ཀྱིས་རང་ཉིད་ཀྱིས་ཡིན་མིན་གསལ་འབྱེད་བྱས་ཟིན་པའི་མི་ཞིག་ལ་ཤེས་རིག་སྤེལ་དུ་བཅུག་ནས་ཤེས་རྒྱ་བསྐྱེད་དུ་བཅུག་ན།ཁྱོད་ཀྱིས་ཁོ་ལ་ཐག་རིང་ལ་མི་རིང་བར་འབད་པ་བྱེད་དུ་མི་འཇུག་པ་མ་ཟད།ད་དུང་འཁོན་འཛིན་བྱེད་དུ་འཇུག་པར་འདོད། ངས་འདི་འདྲའི་དོན་ཆུང་ཞིག་གི་ཆེད་དུ་མི་ལ་ཕོག་ཐུག་གཏོང་མི་འདོད།