དབྱིན་སྐད་དུ། public opinion
རྒྱ་ནག་སྐད་དུ། 公共舆情
བོད་སྐད་དུ། གླེང་ཕྱོགས་བྱ་བ།
གླེང་ཕྱོགས།
གླེང་ཕྱོགས་ཀྱི་རྒྱས་མིང་ལ་གླེང་ཕྱོགས་ཀྱི་གནས་ཚུལ་ཟེར། དེ་ནི་སྤྱི་ཚོགས་ཀྱི་ཁོར་ཡུག་ངེས་ཅན་ཞིག་གི་ནང་དུ་སྤྱི་ཚོགས་དོན་རྐྱེན་འབྱུང་བ་དང་། འཕེལ་རྒྱས། འགྱུར་ལྡོག་བཅས་ལ་དམིགས་ནས། དམངས་ཚོགས་ཀྱིས་ཕྱི་རོལ་ཡུལ་གྱི་སྤྱི་ཚོགས་དོ་དམ་པ་དང་། སྤྱི་ཚོགས་ཀྱི་རྩ་འཛུགས་སྣ་ཚོགས། ད་དུང་སྤྱི་ཚོགས་ཁོར་ཡུག ཀུན་སྤྱོདབཅས་ལ་བཟུང་ཡོད་པའི་རྣམ་འགྱུར་དེ་ཡིན། དེ་ནི་དམངས་ཚོོགས་ཀྱིིས་སྤྱི་ཚོགས་ནང་གི་སྣང་ཚུལ་སྣ་ཚོགས་དང་གནད་དོན་སྣ་ཚོགས་ཀྱི་སྐོར་ལབ་གླེང་བྱེད་པའི་དད་སེམས་དང་། རྣམ་འགྱུར། བསམ་འཆར། བསམ་ཚུལ་སོགས་ཀྱི་མཚོན་ཚུལ་གྱི་སྤྱི་མིང་ལ་ཟེར།
གླེང་ཕྱོགས་ཆ་འཕྲིན་པས་གླེང་ཕྱོགས་ཀྱི་གོ་དོན་ཤེས་རྟོགས་བྱེད་པར་ངེས་པར་དུ་གོ་དོན་བཞི་ཁོང་དུ་ཆུད་པར་བྱ་དགོས་པ་སྟེ།
གཅིག་ནི་གླེང་ཕྱོགས་ཀྱི་གནས་ཚུལ་ནི་དམངས་འདོད་གཅིག་སྡུད་ཀྱི་མཚོན་ཚུལ་ཞིག་ཡིན། དམངས་ཀྱི་འདོད་བློ་ནི་གླེང་ཕྱོགས་ཀྱི་འབྱུང་རྩ་ཆགས་པ་དང་། དམངས་ཀྱི་འདོད་བློ་མེད་ན་གླེང་ཕྱོགས་མེད།།
གཉིས་ནི་གླེང་ཕྱོགས་ཐོག་ནས་མཚོན་པའི་དམངས་འདོད་དང་། སྲིད་འཛིན་པའི་ཇུས་ཐག་གཅོད་པའི་བྱ་སྤྱོད་ལ་ཤུགས་རྐྱེན་ཐེབས་ཐུབ་པའི་”དམངས་འདུན་”ཡིན་པ་ལས་དམངས་ཀྱི་འདོད་བློ་ཡོངས་རྫོགས་མིན།
གསུམ་ནི་སྤྱི་ཚོོགས་དོ་སྣང་གི་ཁྱབ་ཁོངས་འགྱུར་ལྡོག་བྱུང་བ་ནི་གླེང་ཕྱོགས་གསར་བའི་རྨང་གཞི་ཡིན་ཞིང་། གླེང་ཕྱོགས་ཀྱི་གནས་ཚུལ་ལ་ཞིབ་འཇུག་དང་དབྱེ་ཞིབ་བྱེད་སྐབས། ཐོག་མར་གླེང་ཕྱོགས་ཀྱི་འགྱུར་ལྡོག་བྱུང་ཚུལ་དང་། དེའི་འཕེལ་ཕྱོགས། དེའི་འགྱུར་ལྡོག་བཅས་བྱུང་བའི་ཆོས་ཉིད་ལ་ཞིབ་འཇུག་དང་དབྱེ་ཞིབ་བྱ་དགོས།
བཞི་ནི་གླེང་ཕྱོགས་ཀྱི་བར་སྟོང་གིས་གླེང་ཕྱོགས་ཁྱབ་སྤེལ་དང་དེའི་སྲིད་སྐྱོང་མཁན་གྱི་ཇུས་ཐག་གཅོད་པའི་བྱ་སྤྱོད་ལ་ཤུགས་རྐྱེན་གཏོང་བར་ནུས་པ་གལ་ཆེན་ལྡན་ཡོད། དམངས་ཚོགས་ཀྱི་སྤྱི་ཚོགས་ཆབ་སྲིད་ཀྱི་རྣམ་འགྱུར་ནི་རང་ངོས་ཀྱི་ཁེ་ཕན་གྱི་དགོས་མཁོར་རེ་འདུན་ཞུ་བ་དང་མཚོན་ཚུལ་ཞིག་ཡིན་ཞིང་། དེས་དམངས་ཚོགས་ཀྱིས་རྒྱལ་ཁབ་ཀྱི་ཆབ་སྲིད་ལ་བཟུང་བའི་ལྟ་ཚུལ་དང་། བསམ་འཆར་སོགས་འདུས་ཡོད་ལ།། དོན་དངོས་སུ། གླེང་ཕྱོགས་ཀྱི་ཁྱབ་ཁོངས་ཆེས་ཆེ་ཤོས་དེེ་ནི་དམངས་ཚོགས་ཀྱི་ཆབ་སྲིད་འདོད་འདུན་དེ་ཡིན་ནོ།།
གླེང་ཕྱོགས་ཀྱི་ཆ་འཕྲིན།
གླེང་ཕྱོགས་ཀྱི་ཆ་འཕྲིན་ནི་མི་རྣམས་ལ་རྩ་འཛུགས་ཡོད་པ་དང་དམིགས་ཡུལ་ཡོད་པའི་སྒོ་ནས་གླེང་ཕྱོགས་འཚོལ་སྡུད་བྱས་པ་མ་ཟད་ལས་སྣོན་བྱས་པ་ལས་གྲུབ་པ་ཞིག་ཡིན་ཞིང་། དེ་ནི་དམིགས་བསལ་གྱི་གླེང་ཕྱོགས་ཀྱི་རྣམ་པ་དང་འགྱུར་ལྡོག་གི་གནས་ཚུལ་ཁ་ཤས་ལ་ཆེད་དུ་ཞིབ་བརྗོད་དང་མཚོན་པའི་གཞི་རྟེན་གྱི་རྣམ་པ་ཞིག་ཡིན་ཞིང་། གླེང་ཕྱོགས་ཆ་འཕྲིན་ཁྲོད་དུ་འདུས་བའི་་གླེང་ཕྱོགས་ཀྱི་དོན་དག་ནི་ཧ་ཅང་ཉག་ཕྲ་མོད། གླེང་ཕྱོགས་ཀྱི་ཆ་འཕྲིན་དང་གླེང་ཕྱོགས་ཀྱི་ཁྱད་པར་གཙོ་བོ་ནི་གླེང་ཕྱོགས་ནི་ཕྱི་རོལ་ཡུལ་དུ་གནས་པའི་དོན་དངོས་ཡིན་པ་དང་། གླེང་ཕྱོགས་ཀྱི་ཆ་འཕྲིན་ནི་གླེང་ཕྱོགས་ཀྱི་མཚོན་ཚུལ་ཙམ་ཡིན།
གླེང་ཕྱོགས་ཆ་འཕྲིན་ལ་སྒྲ་ཡངས་འཇུག་གིས་བརྗོད་ན་སྤྱི་ཚོགས་ཀྱི་གནས་ཚུལ་གྱི་ཆ་འཕྲིན་ཡང་ཟེར། དེ་ནི་སྤྱི་ཚོགས་ཀྱི་ཆ་འཕྲིན་ཁྱབ་ཁོངས་སུ་གཏོགས་ཤིང་། མི་རྣམས་ཀྱི་འདུ་ཤེས་བརྒྱུད་ནས་བྱུང་བ་དང་སྤྱི་ཚོགས་ལ་ཤུགས་རྐྱེན་ཐེབས་ཐུབ་པའི་ཤེས་བྱ་དང་། གསར་འགྱུར། བརྡ་འཕྲིན། གསང་འཕྲིན། སྐྱེད་ཀ་བཅས་འདུས། གོ་དོན་དོག་པོའི་ཐོག་གི་གླེང་ཕྱོགས་ཆ་འཕྲིན་ཞེས་པ་ནི། གླེང་ཕྱོགས་ཀྱི་རྣམ་པ་དང་དེའི་འགུལ་སྐྱོད་གནས་ཚུལ་མཚོན་པའི་གཞི་རྟེན་སྣ་ཚོགས་མཚོན་པ་ལ་ཟེར། དྲིལ་བསྒྲགས་དང་བསམ་བློའི་འཐབ་ཕྱོགས་ཀྱི་གླེང་ཕྱོགས་ཆ་འཕྲིན་ལས་དོན་ཁྲོད་ཀྱི་གླེང་ཕྱོགས་ཀྱི་ཆ་འཕྲིན་ནི་གླེང་ཕྱོགས་ཀྱི་ཆ་འཕྲིན་ལས་ཀ་བྱེད་མཁན་གྱིས་འཚོལ་སྡུད་བྱས་པའི་གླེང་ཕྱོགས་ཀྱི་གནས་ཚུལ་ལ་དམིགས་ནས་ལེགས་སྒྲིག་དང་། དབྱེ་ཞིབ། ལས་སྣོན་བཅས་བྱས་རྗེས་གྲུབ་པའི་ཡིག་ཆ་དེའི་སྤྱི་ཚོགས་ཀྱི་ཡིག་རིགས་ཤིག་ཡིན། སྐྱེ་མེད་ཁམས་ཀྱི་ཆ་འཕྲིན་དང་། སྐྱེ་དངོས་ལས་རིགས་ཀྱི་ཆ་འཕྲིན། ཚན་རྩལ་གྱི་ཆ་འཕྲིན། དཔལ་འབྱོར་གྱི་ཆ་འཕྲིན། སྤྱི་ཚོགས་ཀྱི་ཆ་འཕྲིན། ཚད་ལྡན་ཆ་འཕྲིན་སོགས་ཚང་མ་གླེང་ཕྱོགས་ཀྱི་ཆ་འཕྲིན་གྱི་ཁོངས་སུ་མི་གཏོགས།
དྲ་རྒྱའི་གླེང་ཕྱོགས།
དྲ་རྒྱའི་གླེང་ཕྱོགས་ནི་སྤྱི་ཚོགས་ཀྱི་བར་སྟོང་ངེས་ཅན་ཞིག་གི་ནང་དུ་དྲ་རྒྱ་བརྒྱུད་དེ་སྤྱི་ཚོགས་དོན་རྐྱེན་བྱུང་བ་དང་། འཕེལ་རྒྱས་དང་འགྱུར་ལྡོག་བྱུང་བར་བརྟེན་ནས་སྤྱི་པའི་གནད་དོན་དང་སྤྱི་ཚོགས་དོ་དམ་པར་སྤྱི་ཚོགས་ཀྱི་ཆབ་སྲིད་ཀྱི་རྣམ་འགྱུར་དང་། ཡིད་ཆེས། རིན་ཐང་བཅས་ལས་ཐོན་པའི་གླེང་ཕྱོགས་ལ་ཟེར་བ་ཡིན། དེ་ནི་སྤྱི་ཚོགས་ནང་གི་སྣང་ཚུལ་སྣ་ཚོགས་དང་གནད་དོན་སྣ་ཚོགས་ཀྱི་སྐོར་བཤད་པའི་དད་སེམས་དང་། རྣམ་འགྱུར། བསམ་འཆར། བསམ་འཆར། བསམ་ཚུལ་སོགས་ཀྱི་མཚོན་ཚུལ་གྱི་བསྡོམས་འབོར་ཡིན། དྲ་རྒྱའི་གླེང་ཕྱོགས་ཀྱི་གནས་ཚུལ་མགྱོགས་མྱུར་ཆགས་པས་སྤྱི་ཚོགས་ལ་ཤུགས་རྐྱེན་ཧ་ཅང་ཆེ། དྲ་རྒྱའི་ལག་རྩལ་བྱ་འཕུར་བ་ལྟར་གོང་དུ་འཕེལ་བ་དང་ཆབས་ཅིག་དྲ་རྒྱའི་སྨྱན་སྦྱོར་ནི་ཚགས་པར་དང་། རྒྱང་བསྒྲགས། བརྙན་འཕྲིན་བཅས་ཀྱི་རྗེས་ཀྱི་”སྨྱན་སྦྱོར་བཞི་པ་”ཡིན་པར་འདོད་པ་དང་། དྲ་རྒྱ་ནི་སྤྱི་ཚོགས་ཀྱི་གླེང་ཕྱོགས་མཚོན་བྱེད་གཙོ་བོའི་གྲས་ཤིག་ཏུ་གྱུར་ཡོད།